عەرەب دخوازن ل سەر گۆندێن کوردان بژین
ئه‌ڤرۆ نيوز:
رێڤەبەرێ ناحیا زومار دیار کر کو پشتی حەشدا شەعبی ھاتیە دەڤەرێ ئاریشین ئەردی ل گۆندێن کوردان ب تایبەتی ل بەردیە و گۆندی حەمەد ئاخا دروست بووینە و عەرەب دبێژن دەمێ وکمەتا دکتاتور یا روخاندی یا عێراقی ئەم ئیناینە ڤان دەڤەران مە بۆ خو خانی ئاڤا کرینە و ئەو خانی ل سەر ئەردێ کوردان یێن ھاتینە ئاڤاکرن و گەلەک ئەردێ چاندنێ ژی عەرەب کاردکەن بۆ دەست ب سەرداگرتنا وی ئەردی.
ئەحمەد جەعفەر، رێڤەبەرێ ناحیا زوممار دیار کر کو “ئاریشێن ئەردێ چاندنێ ل زومار سەرھلداینە، ئەو عەرەب ل سالێن حەفتێیان و ھەشتێیان ھاتینە زومار و ئەردێ چاندنێ یێن خەلکی ل وی وەختی ب زۆرداری ژ خەلکێ ھاتبوو ستاندن، نوکە ئەو عەرەب یێ داخوازا ئەردێ چاندنێ دکەن و گەلەک عەرەبان ژی ل سەر دەمێ حکومەتا دکتاتور سەدام حوسین خانی ل سەر ئەردێ چاندنێ یێن کوردان ئاڤاکربوون و پشتی حەشدا شەعبی ھاتیە زومار ئەو عەرەب یێ دبیژن ئەڤە خانیێن مەنە ئەو ب خوە یێ ل سەر ئەردی کوردان ھاتینە ئاڤاکرن و ئەڤ ئاریشێن مولکداری ل زومار پەیدابووینە”.
ئاشکەرا کر:” عەرەب یێن ڤەگەریاینە زوممار، لێ پشتی حەشدا شەعبی ھاتیە دەڤەرێ پتریا کوردان دووبارە ئاوارەبووینە، ژبەر نە بەرھەڤیا کوردان ل سەر مال و مولکێن وان مە ژی ھەتا نوکە نەشیایە ئاریشە ئەردێ چاندنێ و خانیان ل دەڤەرێ چارەسەر بکەن، چونکو پێدڤیە ھەردوو لایەن بەرھەڤ بن پاشی ئەم بشیێن دەست ب ڤەکۆلینی بکەین”.
ئەو ژی دیار کر کو ھەکە ب رێیێن ئیداری کێشەیێن مولکداری و ئەردێ چاندنێ نەھێنە چارەسەرکرن، دێ ناچاربین دوسەیا ئەردێ چاندنێ و خانیان رەوانەی دادگەھێ بکەین دا کو دادگەە بریارا ئیکلاکەر ل سەر بدەت و سەندەیێن ئەردی و خانیان ب ناڤێ کوردانە و عەرەب ل سالێن ھەشتێیان و نوتان دەست ب سەرا دا گرتیە نوکە ژی ئەو عەرەب یێ دبێژن ئەرد و خانیێن مەنە”.
رێڤەبەرێ ناحیا زوممار گۆت:” عەرەب دبێژن مە ژی ماف یێ ھەی ڤەگەرینە کۆمەلگەھا بەردیە و حەمەد ئاخا وان دەڤەرێن دێ و خەلکێ مە یێ کورد دبیژن ئەرد یێ مەیە ل دەڤەرا زومار سالا 1974 تەعریب ھاتە کرن و خەلکێ کورد راکرن و ل جھێن وان عەرەب ئاکنجی کرن و ل دووڤ دا ژی سالا 1986 دەمێ سکری مووسل ھاتیە دروستکرن ئەو گەھشتە گۆندێن کوردان و عەرەبان ژی ئەو خەلک ئیناینە ل گۆندێ بەردیە و گۆندێن کوردان ئاکنجیی کرن پشتی نەمانا حۆکمەتا دکتاتور یا سەدام حۆسین ئاریشە ئەردی داد روست بوون ھەتا نوکە ئەڤ ئاریشێن ئەردی چاندنێ ماینە ھەلاویستی”.
زێدەتر گۆت:” ھندەک عەرەب دبێژن حکومەتێ ئەم یێن ئیناینە زومار مە بۆ خوە خانی ئاڤاکرینە و ئەو خانی ژی ل سەر مولکێ کوردان ئاڤاکرینە ھەر دەمێ کورد ڤەگەریاینە سەر مالێن خوە دێ ژ نوو کارکەین ئەڤ ئاریشە بھێتە چارەسەرکرن بەرھەڤبوونا ھەردوو لایەنان کورد و عەرەبان ھەکە ژی مە نەشیا چارەسەر بکەن دێ رەوانەی دادگەھێ کەن”.
ئاماژە دا وێ چەندێ ژی کو ئەم داخاز دکەین حەشدا شەعبی ژ وان گۆندان دەرکەڤیت ب تایبەتی گۆندی بەردیە و حەمەد ئاخا ئەڤ کێشەیێن ئەردی ل ڤان گۆندان پەیدابووینە و رێ بھێتە ڤەکرن خەلکێ مە یێ کورد بزڤرنە سەر مالێن خوە و ئەم دێ ل وی وەختی شێین کێشەیا ئەردی و خانیێن ل زومار چارەسەر بکەین ھەتا کورد نەزڤرنە سەر مالێن خوە یا زەحمەت کێشە ئەردی بھێتە چارەسەرکرن”.