فازل میرانی پێشوازیێ ل شانده‌كێ بزاڤا دیموكراتی یا ئاشووری دكه‌ت
ئه‌ڤرۆ:
سكرتێرێ مه‌كته‌با سیاسی یا پارتی دیموكراتی كوردستان، فازل میرانی، ل باره‌گه‌هێ مه‌كته‌با سیاسی پێشوازی ل شانده‌كێ بزاڤا دیموكراتی یا ئاشووری ب سه‌رۆكایه‌تیا یونادم یوسف كنا سكرتێرێ بزاڤێ كر.
د دیداره‌كێ دا فازل میرانی روناهی خسته سه‌ر ره‌وشا ئه‌ڤرۆ یا كوردستانێ و ئیراقێ و ئالۆزیێن دناڤ مه‌یدانا سیاسی ل ئیراقێ و بزاڤێن دهێنه كرن بۆ گه‌هشتنێ ب رێچاره‌كێ بۆ پێكئینانا حوكمه‌تا نوو یا ئیراقێ.
هه‌روه‌سا فازل میرانی باسێ ره‌وشا ئه‌ڤرۆ یا هه‌رێما كوردستانێ و گاڤێن ژئالیێ حوكمه‌تا هه‌رێما كوردستانێ ڤه دهێنه هاڤێتن بۆ دابینكرنا خوه‌شگوزه‌رانیێ بۆ گه‌لێ كوردستانێ.
سكرتێرێ مه‌كته‌با سیاسی یا پارتی دووپاتكر كو سیاسه‌تا پارتی دیموكراتی كوردستان به‌رقه‌راربوونا پێكڤه‌ژیانێ یه ل كوردستانێ و مافێ هه‌ر تاكه‌كی یێ پاراستی بیت و چاوان وه‌لاتیێ هه‌رێما كوردستانێ ماف یێ هه‌ی دهه‌مان ده‌م دا ئه‌رك ژی یێ هه‌ی و پێدڤیه ئه‌م هه‌موو كار بكه‌ین بۆ وێ چه‌ندێ و دخزمه‌تا گه‌لێ كوردستانێ دا بین.
ژ ئالیێ خوه‌ڤه یونادم یوسف كنا، ئاماژه‌كر كو په‌یوه‌ندیێن د ناڤبه‌را پارتی دیموكراتی كوردستان و بزاڤا دیموكراتی یا ئاشووری په‌یوه‌ندیه‌كا دیرۆكی یه. ب تایبه‌ت د ناڤبه‌را گه‌لێ كورد و گه‌لێ ئاشووری دا كو هزاران ساله ب ئاشتیانه وه‌كو برا دگه‌ل هه‌ڤدو دژین و ئه‌ڤه جهێ سه‌رفه‌رازیێ یه بۆ كوردستانێ.
سكرتێرێ بزاڤا دیموكراتی یا ئاشووری په‌سنا رۆلێ پارتی دیموكراتی كوردستان كر كو رۆله‌كێ سه‌ره‌كی د وێ پێكڤه‌ژیانا ل هه‌رێما كوردستانێ هه‌ی دیتیه.
