فراكسیونێن كوردستانی پشكداریێ ل روونشتنا جڤاتا نوونه‌ران دا ناكه‌ن
ئه‌ڤرۆ نیوز:
سه‌رۆكێ فراكسیونا پارتی ل جڤاتا نوونه‌رێن عیراقێ راگه‌هاند فراكسیونێن كوردستانی پشكداریێ ل روونشتنا ئه‌ڤرۆ یا جڤاتا نوونه‌رێن عیراقێ دا ناكه‌ت، كۆ ب كۆشتنا ئه‌بو مه‌هدی ئه‌لموهندس جێگرێ سه‌رۆكێ ده‌سته‌یا حه‌شدا شه‌عبی دجڤیت.
ڤیان سه‌بری سه‌رۆكا فراكسیونا پارتی ل جڤاتا نوونه‌رێن عیراقێ راگه‌هاند فراكسیونێن كوردستانی پشكداریێ د روونشتنا ئه‌ڤرۆ یا جڤاتا نوونه‌رێن عیراقێ ناكه‌ت ئه‌وێ چه‌ندێ ژی دزانن پشكه‌ك ژ سونه‌یان ژی پشكدار نابن.
بریاره ئه‌ڤرۆ جڤاتا نوونه‌رێن عیراقێ ب شێوه‌یه‌كێ نا ئاسایی كۆم دبیت بۆ شرۆڤه‌كرنا بنپێكاریێن سه‌روه‌ریا عیراقێ ژ وێ هێرشا كۆ ئه‌مریكا رۆژا هه‌ینی یا چووی كری و بۆ ئه‌گه‌رێ كوشتنا قاسم سلێمانی فه‌رمانده‌یێ فه‌یلقا قودس یا سوپایێ پاسدارێن ئیرانێ و ئه‌بو مه‌هدی ئه‌لموهه‌ندس جێگرێ سه‌رۆكێ ده‌سته‌یا حه‌شدا شه‌عبی و چه‌ند فه‌رمانده‌یه‌كێن دی یێن ئیرانێ.
فه‌رمانگه‌ها راگه‌هاندنا جڤاتا نوونه‌رێن عیراقێ د راگه‌هاندنه‌كێ دا راگه‌هاند جڤاتا نوونه‌رێن عیراقێ رۆژا ئێك شه‌مبی ده‌مژمێر ئیكێ نیڤرۆ دیاركریه بۆ شرۆڤه‌كرنا بنپێكاریێن سه‌روه‌ریا عیراقێ دجڤیت.
د ده‌مه‌كی دایه ئه‌ڤ كۆمبوونا جڤاتا نوونه‌رێن عیراقێ كۆ چه‌ند فراكسیونێن شیعه ل جڤاتا نوونه‌ران، ره‌شنڤیسا پرۆژه‌یێ یاسایا ده‌رخستنا هیزێن بیانی ژ عیراقێ به‌رهه‌ڤكریه و پێشبینی دئێته‌كرن ل جڤینا ئه‌ڤرۆ یا جڤاتا نوونه‌ران بزاڤا ده‌ستپێكرنا رێ و ئاوایێن په‌سندكرنێ دده‌ن.
