فراكسیۆنێن كوردستانی: سیاسەتا وەزارەتا داراییا ئیراقێ گەهشتییە رادەیێ برسیكرنێ و شەڕێ ژیارا رۆژنەیا فەرمانبەران
فراكسیۆنێن كوردستانی ل جڤاتا نوونەرێن ئیراقێ بەیاننامەیەك ل دۆر نە مەزاختن و نە هنارتنا مووچەیێن فەرمانبەرێن هەرێما كوردستانێ بەلاڤكر و تێدا راگەهاند، ئەڤ بڕیارە دژایەتیكرنا ژیارا رۆژانەیا هەڤوەلاتیێن هەرێما كوردستانێیە.
فراكسیۆنێن كوردستانێ دیاركر ژی» بڕیارا وەزارەتا داراییا فیدرال ب راگرتن و نە مەزاختن و نە هنارتنا مووچەیێن فەرمانبەرێن هەرێمێ ئەم تووشی حێبەتیێ كرین».
د بەیاننامەیا فراكسیۆنێن كوردستانێدا هاتیە ژی» ب سەرنجدان ب بارێ دژوار یێ ل پێشبەری فەرمانبەرێن هەرێما كوردستانێ كو ژ ئەگەرێ سیاسەتێن وەزارەتا داراییا فیدرالیڤە گەهشتییە ئاستێ برسێ و شەڕێ ژیارا رۆژانەیا وان، ڤێ بڕیارێ ئارمانجەكا سیاسی یا ل پشت و بنپێكرنا دستوورێ ئیراقێیە، كو ب گۆڕەی مادەیا (37/ئێك) گەرەنتییا پاراستنا رێزا هەڤوەلاتییان دكەت ل دووڤ بەرچاڤ وەرگرتنا رەوشان».
فراكسیۆنێن كوردستانی د پشكەكا دی یا بەیاننامەیا خوە دا دبێژن» ئەوا وەزارەتا داراییا فیدرال ل بەرانبەر مووچەخۆرێن هەرێما كوردستانێ دكەت بەرۆڤاژی مادەیا (14) ژ دستووری یە كو مافێ وەكهەڤیێ و دادپەروەریێ بۆ هەموو هەڤوەلاتیێن ئیراقێ ل سەرانسەری وی وەلاتی مسۆگەر كریە».
فراكسیۆنێن كوردستانێ رۆهنكر ژی كو ل سەر بنەمایێ ویژدانا نیشتمانی و ئەركێ مرۆڤایەتی و بەرپرسیارەتییا ئەخلاقی، وان ب فەرمی داخواز ژ محەمەد شیاع سودانی، سەرۆك وەزیرێن ئیراقێ كریە ب لەز دەستێوەردانێ بكەت بۆ هنارتنا مووچەیێن فەرمانبەرێن هەرێما كوردستانێ و مافێ هەڤوەلاتییان ب هیچ ناكۆكییەكا سیاسی و تەكنیكی ڤە نەگرێدەت، چونكە مووچە منەت نینە، بەلكو مافەكێ دستوورییە و بۆ هەڤوەلاتییان یێ هاتیە مسۆگەركرن، لەوما گیرۆكرن و راگرتنا وی دێ بیتە سزادانەكا ب كۆم یا فەرمانبەران».
فراكسیۆنێن كوردستانی ل جڤاتا نوونەرێن ئیراقێ دیاركر ژیكو وان داخوازا چارەسەرییەكا بنەڕەتی و بەردەوام بۆ كێشەیا مووچەخۆرێن هەرێما كوردستانێ كریە و بۆ ڤێ مەبەستێ ژی چاڤەڕێی بەرسڤا سەرۆك وەزیرێن ئیراقێ دكەن بۆ وەرگرتنا پێنگاڤا پێدڤی كو ل گەل ئازارێن فەرمانبەران و هەڤوەلاتیێن هەرێما كوردستانێ ئێك دگریت.
فراكسیۆنێن كوردستانی ل دووماهییا بەیاننامەیا خوە داخواز ژ سەرۆككۆمار و وەزیرێن كورد ل حوكمەتا فیدرالی كر هەلوەستێ رۆهن و ئاشكرا یێ خوە سەبارەت ب وان دوژمنكارییان دیار بكەن كو بەرانبەر فەرمانبەرێن هەرێما كوردستانێ دهێنە كرن.
