فروکێن تورکیا پرەک ل دەڤەرا نێروەورێکان بوردومان کر
ئەڤرۆ نیوز، نەوزاد ھلۆری:
ئەڤرۆ دەردورێن دەمژمێر 11:00ێ سپێدێ فروکێن شەرکەرێن تورکیا بوردومانا دڤەرا نێروەورێکان کر ، ژ وانان بوردومانا پرا چەم مشکو و سێ گوندان.
ژێدەرەکێ ل کومەلگەھا سیریێ یا سەر ب ناحیا شێلادزێ بو ئەڤرۆ نیوز گۆت: (ئەڤرۆ دەردورێن 11:00ێ سپێدێ فروکێن شەرکەرێن تورکیا سێ گوندێن کوکەر ، بێزەل و سارکی ل دەڤەرا نێروەورێکان کر و دیسان بوردومانا پرا چەم مشکو ل دەڤەرێ کر ، بەلێ ھەتا نھا ناھێتە زانین کا پر ھاتیە تەقاندن یان نە)
زێدەتر گۆت: ( گەلەک ژ خەلکی َدەڤەرێ ب مەرەما کومکرنا گژ و گیایی قەستا دەڤەرێ و سەر گوندێن خوە کریە و دخوازین کو لایەنێن شولەژێ کار بکەن بو راگرتنا ھێرشێن تورکیا و دخوازین ژی کو پەکەکە ل دەڤەرێن مە بچن داکو بو فروکێن تورکیا نەبنە بھانە)
ب گورەی زانیاریێن ئەڤرۆ نیوز ، سوپایێ تورکیا ب پیادە بو چەند گوندەکێن سنوورێ دەڤەرا نێروەورێکان ھاتیە و جھێن خوە درۆستکرینە، د بەرامبەر دا چەکدارێن پەکەکێ ژی ب دوراتیا 90کم بو دەڤەرێن ئاڤەدانێن سنوورێ قەزا ئامێدیێ ھاتیە خوار.
بوردومانکرنا پرا چەم مشکو د دەمەکێ دایە کو چەند روژێن بوری پرەکا دن ب ناڤێ پرا دوکەرا مازیێ ژلایێ فروکان ھاتە تەقاندن و بویە سەدەم کو رێکا زێدەتری 20 گوندان بھێتە گرتن.