فرۆتنا کەرەستێن ئاڤاکرنێ ل دھۆکێ 50% کێم بووینە

ئه‌ڤرۆ نيوز:

ل دووڤ گۆتنا خودانێن نڤسینگەھێن فرۆتنا کەرستێن ئاڤاکرنێ، فرۆتنا کەرەستان 50% کێم بوویە. ل بەرامبەر ئەندامەکا جڤاتا پارێزگەھا دھۆکێ چەندین ھۆکاران ل سەر کێمبوونا ئاڤاکرنێ ددەتە دیارکرن، ل بەرامبەر ژی ئەندازیارەک دیار دکەت، ھەکە ھەر پێشینەک ھاتبا مەزاختن، دا لڤین کەڤیتە بزاڤا ئاڤاکرنێ ل پارێزگەھێ.

مراد سلێمان وەلاتیەکێ باژێری یە، ل بازارێ نڤسینگەھێن فرۆتنا کەرتستێن ئاڤاھیان مژوولی کرینا کەرستان بوو گۆت: چەند سالە خانیێ من د دەستێ من دایە و ژ بەر قەیرانا دارایی من ئاڤاکرن ل سەر راوستاندیە، مووچە ب نیڤی بوون و ھەر چەند ھەیڤان جارەکێ نە و دیسا مە پارە نین ژی ئاڤا بکەین، ناچاربووینە بچینە تێڤە و ھەر یێ نیڤ تمامە، لێ خودانێن ڤان نڤسینگەھا شێوازێ فرۆتنا کەرەستان گوھۆرین ئێخستینێ و نوکە ب قست ددەن ھەتا رادەکی، باشە ئەگەر مۆچە د دەمێ خوە دا بگەھن مرۆڤ پارەی بۆ بزڤرینتە ڤە.

کەمال ل نڤسینگەھا کانی ماسێ یا فرۆتنا کەرستێن ئاڤاھیان گۆت: خواستن ل سەر کرینا کەستان نینە، پێشتر ھەر ئەم ڤێرا نە دگەھشتین و نوکە ئەو تشت نەمایە و خەلکی پارە نینە و خەلک کێم خانیان ئاڤا دکەت و 50% کێم بوویە و ئەگەر ل سالێن بوری مە رۆژێ 50 تەن فرۆتبان، نوکە 25 تەنان دفرۆشین، دیسا ھوکار گەلەک ھەنە و گومرک ل سەر ئینانا کەرەستێن ئاڤاکرنێ گران بووینە.
ئەندازیار قەیس کریم عیسا ل رێڤەبەریا گشتی یا ئاڤەدانکرنێ و نێشتەجێبوونێ، چەندین ھۆکار بۆ کێم ئاڤاکرنا خانیان دیارکرن و گۆت: ھەکە حوکمەت دەرگەھێ دانا سلفان ڤەکەت وەک بەرێ و ھەتا تشتەکێ کێم بیت ژی، ب تنێ ھاریکاریەک بیت بۆ وەلاتی دێ لڤین کەڤیتە کەرتێ ئاڤاکرنێ، دیسا قەیرانا دارایی و ئابووری ل سەر مللەتێ مە زیانێن خوە ھەنە و ترسەک ل دەف خەلکی ھەیە کو نەوێرن پارێن خوە ب مەزێخن بۆ پاشەرۆژەکا نەدیار، دیسا چەندین ھۆکارێن جودا ھەنە کو یێن تایبەت ب خەلکی ڤە، لێ یێن گشتی ھەر ئەو بوون یێن مە دیارکرین.
جومبەد شوکری ئاکرەیی ئەندام ل جڤاتا پارێزگەھا دھۆکێ، چەندین ھۆکار ل سەر کێمکرنا ئاڤاکرنێ دانە دیارکرنو گۆت: چەندین ھۆکار ھەنە ئاڤاکرن کێم بوویە قەیرانا دارایی و نەبوونا مووچان و راوەستاندنا سولفێن عەقاری و شەرێ داعش، دیسا پارێزگەە وەک سەنتەرێن ژیانا مرۆڤان گەلەک مەزن بووینە و مە پتر گرنگی دایە سەنتەری و مە گرنگی ب گوندان کێم دایە وەک چێکرنا رێیان و گەھاندنا ھەموو ئالاڤێن ژیانێ بۆ گوندان، پێشتر پشتەڤانیا خەلکێ گوندان باش دھاتەکرن ب رێیێن جودا و نوکە ئەڤ پشتەڤانیە کێم بوویە، دیسا ھوکار ھەنە کو پارچە زەڤی ژی گران بووین و ب تایبەت ل سەنتەرێن باژێری و گەلەک دەولەمەندان شێوازێ ئاڤاکرنێ ژ فرەھی بەر ب ستینی برینە و پرۆژێن مەزن ھاتینە دروستکرن وەک ئەڤرۆ ستی و کایارستی و دابین ستی و ئەڤ ھوکارە نە کو کار کێم بیت و ئێدی بەتالی زێدەبیت و ئاڤاکرن کێم بیت.
گۆت ژی “گەلەک خەلکی ب شێوەکێ نە قانوونی و نە دروست و ب مەرەما قورتالبوون ژ کرێدایی ل سەر ئەردێ حوکمەتێ خانی ئاڤاکرن، ب رەنگەکی قانوون رێ نادەت زێدەگاڤی ل سەر ئەردێ حوکمەتێ بھێنەکرن سزدان ھەیە وەک زیندان و سزادان و خرابکرنا خانی. ھێشتا گۆت: ھەر وەلاتەکێ شەر تێدا ھەبیت گۆمان نینە بھایێن کەل و پەلان نە راوستیانە و دیسا کارتێکرن ل سەر ژیان وەلاتیان ھەیە”.

کۆمێنتا تە