فرۆكه‌ك ب 81 سه‌رنشين ڤه كه‌فته خوار
ئه‌ڤرۆ نيوز:
به‌رپرسێن حوكمه‌تا كۆلۆمپيا ئه‌ڤرۆ رۆژا سێشه‌مبى كه‌فتنه خوارا فرۆكه‌كا نه‌فه‌رهه‌لگر ب 81 سه‌رنشين ڤه راگه‌هاند كو د ناڤ وان دا ژماره‌كا ياريكه‌رێن ته‌پا پێ يێن خه‌لكێ به‌رازيل د ناڤ دانه.
سكای نیوز چه‌نده‌كێ به‌رى نوكه به‌لاڤكر كو ئه‌و فرۆكه د ده‌مێ ب رێكه‌فتنێ دا بۆ فرۆكخانا خوسێ ماريا كوردوفا ل ميديلين كۆلۆمپيا ب 81 سه‌رنشين ڤه كه‌فته خوار.
به‌رپرسێن فرۆكخانێ د تويته‌كى دا ل تويته‌رى به‌لاڤكريه كو ئه‌و فرۆكه ژ بۆليڤيا رابوويه و هێشتا ئه‌گه‌رێ تێكشكاندنا وێ نه‌هاتيه زانين كا بۆچى كه‌فتيه خوار.
ب گۆره‌ى ميديايێن ناڤخۆى يێن كۆلۆمپى ئه‌ندامێن يانا چاپيكوينسى يا به‌رازيلى د ناڤ فرۆكێ دا هه‌بوون كو بڕيار بوو رۆژا چارشه‌مبيا داهاتى ياريا دووماهيێ ژ خولا ته‌پا پێ يا كۆبا ئه‌مريكا بۆ يانان بكه‌ن.
ده‌سته‌يا فرۆكه‌ڤانيا كۆلۆمپى ژى ئاشكه‌را كريه كو نوكه هێزێن هاريكاريێ مژوولى ڤه‌گوهاستنا ئه‌وان كه‌سانن يێن ژ تێكشه‌ستنا فرۆكێ رزگار بووين كو ب گۆره‌ى پێزانينێن ده‌ستپێكى هه‌شت كه‌س رزگار بووينه.