فرەنسا هەڤسۆزی و پشتەڤانییا خوە بۆ هەرێما كوردستانێ بەرانبەر هێرشێن ل سەر دهێنە كرن دوپات دكەت
سەرۆكێ هەرێما كوردستانێ و وەزیرێ دەرڤەیێ فرەنسا پەیوەندییەكا تەلەفۆنی ئەنجامدا و تێدا وەزیرێ فرەنسی هەڤسۆزی و پشتەڤانییا وەلاتێ خوە بۆ هەرێما كوردستانێ دوپاتكر.
سەرۆكایەتییا هەرێما كوردستانێ ڕاگەهاند، نێچیرڤان بارزانی، سەرۆكێ هەرێما كوردستانێ و ژۆن نوێل بارۆ، وەزیرێ دەرڤەیێ فرەنسا پەیوەندییەكا تەلەفۆنی ئەنجامدا.
د وێ پەیوەندییا تەلەفۆنیدا، وەكو د بەیاننامەیا سەرۆكایەتییا هەرێما كوردستانێ دا هاتی» وەزیرێ دەرڤەیێ فرەنسا هەڤسۆزی و پشتەڤانییا وەلاتێ خوە بۆ هەرێما كوردستانێ دوپاتكر ل بەرانبەر وان هێرشێن ل سەر هەرێما كوردستانێ دهێنە كرن».
سەرۆكایەتییا هەرێمێ دیاركر ژی»هەردو ئالییان پێشهاتێن بەردەوام یێن دەڤەرێ و ئاسۆیێن چارەسەركرنا كێشەیان گەنگەشەكر و هەڤڕابوون ل سەر بەردەوامییا هەماهەنگییا نێزیك د ناڤبەرا واندا بۆ پاراستنا ئارامیێ».
ژ ئالیێ خوەڤە، نێچیرڤان بارزانی سوپاسییا پشتەڤانییا بەردەوام یا فرەنسا بۆ هەرێما كوردستانێ كر و دوپاتی ل گرنگییا ڕۆلێ فرەنسا و جڤاكا نێڤدەولەتی د كێمكرنا ئالۆزییان و دوورئێخستنا دەڤەرێ ژ مەترسیێن شەڕی كر.
