فرەنسا و بریتانیا پشتەڤانیێ ل پرۆژێ ئەمریکا بۆ سووریێ دکەن
ئەڤرۆ نیوز:
ل گۆر راپۆرتەکا رۆژناما واشنتۆن پۆست پشتی کو ئەمریکا دیار کری ئەو دخوازن ب رێکێن سیاسی و ب پشکداریا ھەموو ئالیێن سیاسی ل سووریایێ حوکمەتەکا دەمکی ئاڤا کەن دا کو دەرگەە بۆ چارەسەریا سیاسی ل سووریایێ ڤەبیت، چونکو ب شەری قەیرانا سووریێ ھەر کو دچیت بەرفرەھتر لێ دھێت و کاریگەریا خوە ل ھەموو دەڤەرێ و جیھانێ دکەت و ژ بەر ھندێ ژی بریارا بەری سەرێ سالێ ل ئەمریکا کۆمبوونەک ب پشکداریا پرانیا وەلاتێن جیھانێ بۆ چارەکرنا قەیرانا سووریێ برێڤە بچیت.
د بەردەوامیا راپۆرتێ دا ھاتیە دیار کرن کو پشتی ھەلویستێ ئەمریکا یێ سەبارەت ب سووریێ نھا بریتانیا و فرەنسا ژ پشتەڤانیێ ل پرۆژێ ئەمریکا دکەن و دخوازن کو د زووترین دەم دا حوکمەتەکا دەمکی ل سووریێ بھێتە ئاڤاکرن و ھەموو ئالیێن سیاسی یێن سووریێ تێدا پشکدار بن و ئارمانجا سەرەکی یا ئاڤاکرنا وێ حوکمەتێ ژی ئەوە دا کو داعش و رێکخراوێن دی یێن تیرۆرستی ل سووریایێ نەمینن و ب رێیا حوکمەتا دەمکی ھەلبژارتن بھێنە کرن دا خەلک بریارێ ل سەر چارەنڤیسێ خوە بدەت.
ل ئالیێ دی سەرۆک وەزیرێن بریتانیا د داخۆیانیەکێ دا راگەھاند کو نھا دڤێت ئەم کار بۆ ژناڤبرنا داعشێ بکەین، چونکو داعش نھا ژ رژێما بەشاری مەترسیدارترە و دڤێت ژناڤ بچیت، ژ بەر وێ یەکێ ژی نھا دڤێت کار ل سەر ھندەک رێیان بھێتە کرن دا بشێین حوکمەتەکا دەمکی ل سووریێ ئاڤا کەین، ئەم ژی وەک ئەمریکا پشتەڤانیێ ل سووریایەک ئێکگرتی دکەین، لێ مە دڤێت حوکمەتا دەمکی یا سوورییێ کار بۆ ئاڤاکرنا سیستەمەک دیموکراتیک بکەت، چونکو شەرێ ل سووریێ و قەیرانا وی وەلاتی نیشا ددەت کو ھەتا سیستەمەک دیموکراتیک ل وی وەلاتی ئاڤا نەبیت و خەلک نەگەھنە مافێن خوە ئەم نەشێین شەری بدەینە راگرتن.
سەرۆک کۆمارێ فرەنسا ژی سەبارەت ب کۆمبوونا بەری سەرێ سالێ ل ئەمریکا بۆ چارەکرنا قەیرانا سووریێ و شەرێ ل دژی تیرۆرێ دیار کر کو رەنگە نھا دەمێ ھندێ نەبیت ئەم بەحسێ چارەنڤیسێ بەشاری بکەین، لێ دڤێت ئەم باش بزانین کو دەم ھاتیە چارەیەک گونجای بۆ سووریێ پەیدا کەین، چونکو بەردەوامیا قەیرانا ل وی وەلاتی وەسا کریە کو داعش و رێکخراوێن دی یێن تیرۆرستی ب ھێز کەڤن و مەترسیا وان ل سەر ئورۆپا ژی رۆژ ب رۆژێ زێدەتر دبیت، ژ بەر ھندێ ژی دڤێت ب پشکداریا ھەموو ئالیێن سیاسی ل سووریێ حوکمەتەک بەروەخت بھێتە ئاڤاکرن، ئەز ب باوەرم کو کۆمبوونا ئەمریکا دێ بۆ پاشەرۆژا سووریێ گەلەک گرنگ بیت.
چاڤدێرێن سیاسی ژی دیار دکەن کو ژ بەر داعشێ و رێکخراوێن دی یێن تیرۆرستی نھا وەلاتێن ئورۆپی ل دژی مانا بەشاری نینن و دخوازن بەری ھەر تشتەکێ داعش ژناڤ بچیت، چونکو نھا ئەو داعشێ ب دوژمنێ سەرەکی دبینن نە کو رژێما بەشاری.