فرەنسا پشتەڤانیێ ل ریفراندۆما کوردستانێ دکەت
ئەڤرۆ نيوز:
فرەنسا و گەلەک وەلاتێن دی یێن ئورۆپا ل سەر وێ باوەریێ نە کو ریفراندۆما ھەرێما کوردستانێ مافەکێ سروشتی یێ گەلێ کوردستانێ یە و ئەو دێ ب چو رەنگەکێ ئاستەنگیان دروست نەکەن و ھەتا دێ پشتەڤانیێ ژی لێ کەن ھەلویستێ فرەنسا گەلەکێ باشە و ئەو یەک بۆ پاشەرۆژا کوردستانێ گرنگە.
ل گۆر راپۆرتەکا مالپەرێ نێرینا ئازاد یا تورکی چەندین وەزیر و ئەندامێن پەرلەمانی یێن فرەنسا دیار کرینە کو ریفراندۆم مافەکێ سروشتی یێ گەلێ کوردستانێ یە و کوردان دڤێت چارەنڤیسێ خوە ب دەستێ خوە دیار بکەن و ژ بەر ھندێ ژی نابیت چو وەلاتەکێ بیانی دەستیوەردانی د کاروبارێ ناڤخوەیی یێ ھەرێما کوردستانێ دا بکەت و فرەنسا ژی پشتەڤانیێ ل ریفراندۆما ھەرێما کوردستانێ دکەت و بریارا خەلکێ کوردستانێ ھەر چ بیت دێ فرەنسا رێزێ لێ گریت.
د بەردەوامیا راپۆرتێ دا ئەو یەک ژی ھاتیە دیار کرن کو گەلەک ئەندامێن پەرلەمانی و سیاسەتمەدارێن ئورۆپی ژی پشتەڤانیێ ل ریفراندۆما ھەرێما کوردستانێ دکەن و ل گۆر باوەریا وان مافێ گەلێ کوردە ئێدی چارەنڤیسێ خوە دیار بکەن و ئەزموونێن چەندین سالێن بۆری د ناڤبەرا ھەولێرێ و بەغدایێ ژی نیشا ددەت کو دەستھەلاتدارێن بەغدایێ رێزێ ل مافێن کوردان ناگرن و ژ بەر ھندێ ژی ئێدی کورد نەشێن ل گەل بەغدایێ بمینن و باشترین چارەسەری ژی ئەوە کو کورد ب رێیا ریفراندۆمێ چارەنڤیسێ خوە ب دەستێ خوە دیار کەن.
د راپۆرتێ دا ئەو یەک ژی ھاتیە دیار کرن کو فرەنسا ئێکە ژ وان وەلاتێن ئورۆپی کو د شەرێ ل دژی داعشێ دا ب رەنگەکێ باش ھاریکاریا کوردستانێ کریە و سەرۆک کۆمارێ فرەنسا چەندین جاران سەرەدانا ھەولێرێ یا کری و پشتەڤانیا خوە بۆ کوردستانێ دیار کریە و ئەڤرۆکە ژی فرەنسا وەکو ئێکەم وەلاتێ ئورۆپی پشتەڤانیێ ل ریفراندۆما ھەرێما کوردستانێ دکەت و ئەو یەک ژی بێگومان دێ کارتێکرنا خوە ل ھەلویستێ گەلەک وەلاتێن دی یێن ئورۆپی ژی کەت.
چاڤدێرێن سیاسی یێن کورد ل ئورۆپا ژی دیار دکەن کو ھەلویستێ وەلاتێن ئورۆپی ب گشتی ل ھەمبەر کوردان باشە و ئەو پشتەڤانیێ ل مافێن کوردان دکەن و ھەکە ھێزێن کوردی ل ھەرێما کوردستانێ د ناڤا خوە دا ئێک ھەلویست بن و ل ریفراندۆمێ ژی پرانیا خەلکێ کوردستانێ داخوازا دەولەتا سەربخوە بکەن دێ ھەموو وەلاتێن ئورۆپی پشتەڤانیێ ل کوردان کەن، چونکو ئەڤرۆکە تێگەھشتنەکا باش یا ئورۆپیان ل ھەمبەر کوردستانێ یا ھەی و ب تایبەتی ژی بۆ ھەموو وەلاتێن ئورۆپا ھاتیە سەلماندن کو بەرپرسێن بەغدایێ ھەکە ب ھێز کەڤن و دەلیڤا خوە ببینن دێ وەکو رژێما سەدامی زۆرداریێ ل کوردان کەن و ژ بەر ھندێ ژی ئەو پشتەڤانیێ ل ھندێ دکەن کو کورد چارەنڤیسێ خوە ب دەستێ خوە دیار کەن.
