فشار ل ئوروپا دهێته كرن پتر هاریكاریا پێشمه‌رگه‌ى بكه‌ن
ئه‌ڤرۆ نیوز،زنار تۆڤى:
نوونه‌رێ حكومه‌تا هه‌رێما كوردستانێ ل په‌رله‌مانێ ئه‌وروپا دلاوه‌ر خالد ئاژگه‌یى بۆ ئه‌ڤرۆ نیوز خویاكر:ل روژا چارشه‌مبى 29/4/2015 عایشا ئوسمان دایكا سێ شه‌هیدێن شه‌رێ داعش دێ به‌شدارى كومبونه‌كا په‌رله‌مانێ ئه‌وروپا بیت و بریاره په‌رله‌مانێ ئه‌وروپا رێزلێنانه‌كا تایبه‌ت بۆ دایكا سێ شه‌هیدان و ئافره‌تێن ئێزدى رێكبێخیت،هه‌روه‌سا ل هه‌مان روژ په‌رله‌مانێ ئه‌وروپا دێ كومبونه‌كا تایبه‌ت لدور كه‌یسا ب جینوسایدناساندنا تاوانێن داعش ل دژى كوردێن ئێزدى سازكه‌ت و رێز ل خه‌بات و قوربانیدانا ژنێن كورد بگریت د هه‌مى قوناغێن مێژوویى یێن خه‌باتا ملله‌تێ كورد و گوت ژى: زوربه‌یا ئه‌ندامێن په‌رله‌مانێ ئه‌وروپا دێ ئاماده‌بن و ئه‌ڤ كومبونه دێ یا تایبه‌ت بیت لسه‌ر گفتوگوكرنا ڤێ پرسێ،زێده‌بارى دایكا سێ شه‌هیدان كچه‌كا رزگاربوویى ژ ده‌ستێ داعشان و ڤیان ده‌خیل په‌رله‌مانتارا كوردا ئێزدى ل په‌رله‌مانێ عێراقێ دێ به‌رهه‌ڤى ڤێ كومبونێ بن،كو ب ره‌نگه‌كێ فه‌رمى ژلایێ په‌رله‌مانێ ئه‌وروپى هاتینه گازیكرن.
ناڤهاتى خویاكر ژى:بریاره پشتى كومبونێ مارتن شوولتز سه‌روكێ په‌رله‌مانێ ئه‌وروپا پێشوازیا شاندێ كوردى بكه‌ت و رێوره‌سمه‌كێ تایبه‌ت بۆ ئه‌نجام بده‌ت،دوى رێوره‌سمێ فه‌رمیدا وه‌ك رێزگرتن بۆ خه‌بات و قوربانیدانا ئافره‌تا كورد دهه‌مى قوناغێن خه‌باتا ملله‌تێ كوردا دا،رێز ل دایكا سێ شه‌هیدان و ئافره‌تێن ئێزدى بگریت.
هه‌روه‌یسا گوت:گرنگیا ڤێ كومبونێ ئه‌وه كو فشار ئێخستنه بۆ سه‌ر وه‌لاتێن ئه‌ندامێن ئێكه‌تیا ئه‌ورپا،بۆ كاركرنا ب جینوسایدناساندنا تاوانێن داعشه دژى كوردێن ئێزدى و پتر هاریكاریكرنا هێزێن پێشمه‌رگه‌ى د شه‌رێ داعشدا.