فلمه‌كێ كوردى دێ پشكدارى فيستڤالا 44ێ يا Gent بيت
ئه‌ڤرۆ نيوز:
“زاگروس” فلمێ ئێكانه‌يێ درێژێ دەرهێنەرێ کورد “سەهیم عومەر خەلیفە” يه، د گەرا 44 یا فستیڤالا فلمێن گێنت– Gent یا نێڤدەولەتی دا دێ پشكدار بيت.
گێنت، وەکو مەزنترین و گرنگترین فستیڤالا سینەمایی ل بەلژیکا دهێته نياسين و ئەڤه دبيتە نمایشا ئێكێ يا فلمی د فەستیڤالێن جیهانێ دا.
د پشکا هه‌ڤركيێن فلمێن درێژ دا، 12 فلم د پشكدارن، لێ تێدا ب تنێ ئێك فلم نوونەراتیا بەلژیکا دکەت، ئەو ژی فلمێ “زاگروس”ـە کو چیرۆکا وێ کوردی یە و گرێدایی بەلژیکایە.
چالاکیێن فستیڤالێ ل 10 هه‌تا 20ى ئۆکتۆبەر ل باژارێ گێنت ل بەلژیکا دێ ب رێڤه چن.
“زاگروس” بەحسا چێروکا شڤانەکی ب ناڤێ زاگروس دکەت کو ئەو گەلەک حەز ژ هەڤژینا خوە دکەت، کوردستان ژی ژ بۆ وی به‌هەشتە، لێ هەڤژینا وی هاڤین و کچا وی ریهان، بەر ب بەلژیکا ڤە دچن، د پشت را زاگروس ژی بڕیار ددەت بچيتە وی وەلاتی.
ل بەلژیکا گەلەک بابەتێن نوو ل دۆر هەڤژینا خوە دزانيت، لەوما وەکو جاران باوەری ب وێ نامینيت و بڕیار ددەت دووبارە بزڤريتە وەلاتێ خوە کوردستانێ.
د ڤی بەرهەمێ سینەمایی دا، هەرئێک ژ فەیاز دۆمان، حەلیما ئێلتەر، سوات ئۆستا و هونەرمەندێ سترانبێژێ بەرنیاسێ کورد، هۆزان برادەر رۆلێ خوە دبينن.
زاگروس” بەرهەمەکێ هەڤپشکێ بەلژیکا و هۆلەندایە، پرۆدیۆسەرێ سەرەکی یێ فلمی دریس فالیپۆیە و سیناریۆیا فلمی ژ لايێ سەهیم عومەر، جەین- کلود و ڤان ریچکهام هاتیە ئامادەکرن.
کارێ وێنەگرتن، دەنگ و مۆنتاژا فلمی ژ لايێ سینەماکارێن بەلژیکی و هۆلەندی هاتینە ئەنجامدان.
ئەڤ بەرهەمێ سینەمایی ژبلی ڤێ فيستیڤالێ، د چەند فيستیڤالێن دى یێن سینەمایی دا هاتیە وەرگرتن و د دەمێ بێت دا، ئەو ئێك دێ هێته بەلاڤکرن.
ژ لايه‌كێ دى ڤە، نمایشا فلمێ “زاگرۆس” ل 15ى نۆڤێمبەرا 2017ێ ل سینەمایێن بەلژیکا دێ دەست پێ کەت.
سەهیم عومەر خەلیفە، بەرى نها ب کورتەفلمێ “میسیێ بەغداد”، “ولاتی قەهرەمانان” و “نێچیرڤانێ خراپ”، 97 خەلات د فەستیڤالین سینەمایی دا وەرگرتينە.
دو سالان ل سەر ئێك، کورتەفلمێ “میسیێ بەغداد” و “نێچیرڤانێ خراپ” بەربژێرێن خەلاتێ ئۆسکار بوون بۆ باشترین کورتەفلم و ژ 10 فلمێن بەربژێر بوون بۆ ڤی خەلاتی.