فلمێ روو ب روو بوونا مرنێ ب كه‌ته‌رى باشترین خه‌لاتێ دكیۆمێنتارى وه‌رگرت
ئه‌ڤرۆ نیوز ، زنار تۆڤى:
ئه‌ڤرۆ گه‌را چارێ یا فلمه فیسته‌ڤالا سینه‌مایى یا دژى تیرۆرێ ل هه‌ولێرێ دووماهى ب كارێن خوه ئینان، فلمێ روو ب روو بوونا مرنێ ب كه‌ته‌رى یێ ده‌رهێنه‌رێ سه‌روه‌ر عه‌بدوللا شیا دو خه‌لاتان ب ده‌ستڤه بینیت، كو خه‌لاته‌ك ژ وان یێ باشترین فلمێ دكیۆمێنتارى بوو د وێ فیسته‌ڤالێ دا، هه‌روه‌سا خه‌لاته‌كێ رێزلێنانێ ب ئه‌فسه‌ره‌كێ پشكدار د ڤى فلمێ دكیۆمێنتارى دا هاته‌دان، ب ره‌نگه‌كێ گشتى هه‌موو مێهڤانێن بیانى و ب تایبه‌تى یێن عه‌ره‌ب پێشه‌وازیه‌كا گه‌رم ل ڤى فلمى كریه.
ده‌رهێنه‌ر سه‌روه‌ر عه‌بدوللا بۆ ئه‌ڤرۆ نیوز گۆت: فلمێ دكیۆمێنتارى یێ روو ب روو بوونا مرنێ ب كه‌ته‌رى ل سه‌ر ئه‌ندازا سه‌ربازى یا پێشمه‌رگه یه، كو هه‌موو قاره‌مانێن پشكدار دڤى فلمى دا ئه‌فسه‌ر و پێشمه‌رگێن سه‌ر ب كه‌تیبا ناڤبرى ڤه‌نه، ماوێ ڤى فلمى 45 خوله‌كن و ل پرانیا سه‌نگه‌رێن شه‌رى د ماوێ دو سال و نیڤادا هاتیه وێنه‌كرن، د ده‌مێ وێنه‌كرنێ دا چه‌ندین قاره‌مانێن ڤى فلمى شه‌هید دبن، ئه‌ڤ فلمه ل سه‌ر قاره‌مانى و لێهاتیا پێشمه‌رگێ كوردستانێ یه ل شه‌رێ دژى تیرۆرستێن داعش، كو كارێ ڤێ تیمێ راكرن و ژ ناڤبرنا بۆمب و مینێن داعشێ بوویه، هه‌تا نوكه ڤى فلمى چه‌ندین خه‌لات وه‌رگرتینه، هه‌روه‌سا د گه‌را چارێ یا فلمه فیسته‌ڤالا سینه‌مایى یا دژى تیرۆرێ ل هه‌ولێرێ خه‌لاتێ باشترین فلمێ دكیۆمێنتارى وه‌رگرت د ڤێ فیسته‌ڤالێ دا، هه‌روه‌سا خه‌لاته‌كێ رێزلێنانێ ژى وه‌رگرت.
