فلمەكێ كوردی ئوسترالی هەڤڕكییا وەرگرتنا خەلاتان دكەت
رەمەزان زەكەریا
كورتە فلمێ (دەریایا هێڤییێ) ژ دەرهێنانا جوبڕائیل ئەبوبەكر، سەركەفتنەكا نوو دبۆارێ سینەمایا كوردی دا تۆمار دكەت و د خولا 26 یا فیستەڤالا نێڤدەولەتییا فلمێ زانستی یێ سینەما دا ل وەلاتێ ئوسترالیا شەڕێ وەرگرتنا خەلاتان دكەت.
ناڤهاتی بۆ رۆژنامەیا ئەڤرۆ گۆت: د ڤێ خولێ دا بەریكانەیەكا زۆر دژوار هەبوو ژ كۆما 4,600 فلمێن پێشكێشكری ژ سەرانسەری جیهانێ بتنێ 110 فلم هاتینە هەلبژارتن و وەرگرتن، فیستیڤال ب مەزنترین فێستیڤالا فلمێ زانستی ل نیڤا كۆڕا باشوور یا جیهانێ دهێتە هژمارتن، ئارمانجا وێ نیشادانا باشترین بەرهەمێن سینەمایا زانستی یە د بۆارێن جوداجودا دا، وەك: فلمێن كورت و درێژ، دوكیۆمێنتاری، زنجیرەیێن تەلەڤزیۆنی، ڤیدیۆیێن ستوونی، فێركاری و ئەنیمەیشن، ب مەرجەكێ بابەتێ وان پەیوەندییا ڕاستەوخۆ ب زانستی ڤە هەبێت.
ناڤبری گۆت: ناڤەرۆكا فلمێ دەریایا هێڤییێ پەردەێ ل سەر زیانێن كاڤلكەرێن شەڕی ڕادكەت و ب گرنگیدان ب شوونەوارێن هەستیار و جەستەیی یێن ئاوارەبوونا ب زۆری، داكوكیێ دكەتە سەر ژیانا وان مەدەنییێن پشتی شەڕی ئاسێ بووین، فلم چاڤدێرییا وان كەسان دكەت ئەوێن نەچار بووین مالێن خۆ بجه بهێلن و د گەڕیانەكا بێهێڤی دا بۆ دیتنا سەلامەتی و ژیانەكا ب ڕێز، هەموو تشتی دكەنە مەترسی دا و دناڤ ڕێكێن كوژەك و مەترسیدار دا دەرباز دبن.
