فلمەکێ کوردی د فێستیڤالا کامبریج یا نێڤدەولەتی یا فلمان دا ل بریتانیا هاتە نیشادان

زاخۆ، دلۆڤان هالۆ:

فلمێ کوردی یێ بناڤێ (ئەردێ سەخت و عەسمان دوور) ژ دەرهێنانا (هەوراز محەمەد)، د خۆلا ٤٥ێ یا فیستیڤالا کامبریج یا نێڤدەولەتی یا فلمان دا ل بریتانیا هاتە نیشادان، کو بۆ ئێکەم جارە ئەڤ فلمە ل سەر ئاستێ نێڤدەولەتی دهێته نیشادان.
دەرهێنەرێ فلمی (هەوراز محمەد) دیارکر کو ئەڤ فلمە ژ دەرهێنانا منە، و ژ نڤیسین و سیناریۆیا من و مەنسور تایفۆری یە. سالم سەلاڤاتی کارێ وێنەگرتنا فلمی کرییە. هەر ئێك ژ ئەکتەران مریەم بۆبانی، بەختیار پەنجەیی، دیمەن زەندی و ئەژدەر سازگار ڕۆلێ سەرەکی د ڤی فلمی دا گێڕاینە.
ناڤهاتی ئاماژە ب وێ چەندێ ژی کر کو ئەڤ فلمێ سینەمایی ل دەڤەرێن سنۆری یێن کوردستانێ هاتیە وێنەکرن، کو دڕامایەکا هەستیاڕ و پڕە ژ هەستان. ئەڤ فلمە بەحسێ تاوان و بیرهاتن و کاریگەرییا دومدرێژ یا شەڕی دکەت.
چیڕۆکا فلمی دەربارەی کەسەکێ یە بناڤێ (هاروون) کو شۆڕەشگێڕەکێ کوردە و کەفتیە دبن کاریگەرییا برینێن دەروونی یێن ڕابردوویی و بارگرانیا وان ڕوودانێن ل دەمێ بووری ب سەرێ وی هاتین.
گۆت ژی:”هاروون ژ بۆ دیتنا ئارامیێ ل دەستپێکێ پەنایێ دبەتە بەر مۆزیکا ئایینی یا یارسان، پاشان ڕێکەکێ دگریتە بەر کو دگەهینتە دەڤ مریەمێ کو ژنەکا کوردە ل گۆندەکێ دوور ل دەڤەرا سێگۆشەیا سنۆران دژیت، ئەڤ ژنە ب نەخشکرنا لەشی و خال کێشانا نەریتی یا کوردی ناسیارە.”
زێدەتر ژی گۆت:”ئەڤ فلمە ب ڕێکا گەشتا هاروونی بابەتەکێ د ئێخیتە بەرچاڤ کو ب دەگمەن د ژیانا گشتی یا کوردی دا ب ئاشکرایی بەحس لێ هاتیە کرن، ئه‌و ژی کاریگەریێن ڕەوشتی و دەروونی یێن شەڕی نە، ب تایبەت پشتی شەڕ و ناکۆکیان. ئەڤ فلمە شەڕی وەکو دیمەنەکێ سەرنجڕاکێش نیشا نادەت، بەلکو بەرێ خوە ددەتە وان تشتێن پشتی شەڕی دمینن، وان برینێن شەڕ ل سەر لەشی و ئەردی و خێزان و ڕۆحا مرۆڤی بجهـ دهێلیت.”

کۆمێنتا تە