فه‌رماندێ فه‌رمانده‌يا سپيلكى ئه‌گه‌رێن سه‌ركه‌فتنێن پێشمه‌رگه‌يى ئاشكه‌را دكه‌ت
ئەڤرۆ نیوز، بارزان سلێمان مزووری:
فەرماندێ فەرماندەیا “سپیلک” ل میحوەرێ تلسقوف راگه‌هاند کو ئەو دەستکەفتێن نھا پێشمەرگەی ب دەست خوه ڤە ئینائین ب پلانێن سەرۆک بارزانی نە، لەوما پێشمەرگە چاڤەرێ ھەر بریارەکا وى يه.
ب دووراتيا 1800 مه‌تران ژ چه‌كدارێن داعش و ل ميحوه‌رێ تلسقوف، تارق سلێمان ھەرنی، فەرماندێ فەرماندەیا “سپیلک” بۆ ئەڤرو نیوز ته‌كست ل سه‌ر وێ چه‌ندێ كر كو وره‌يا پێشمه‌رگه‌يى گه‌له‌ك يا بلنده و ب ره‌نگه‌كێ گه‌له‌ك باش به‌رسڤا هه‌ر هێرشه‌كا چه‌كدارێن داعش دده‌ن.
دا زانين ژى كو داعش وه‌كو به‌رێ نه‌مايه و گۆت: “هه‌ر مه‌فره‌زه‌كا وان يا خوه نێزيكى پێشمه‌رگه‌يى دكه‌ت، ب ره‌نگه‌كێ گه‌له‌ك به‌رچاڤ شكه‌ستنێ دخوه‌ت و ب چه‌كێ گران به‌رسڤ لێ دهێته دان، زيانێن مه‌زن ژى دگه‌هنێ”.
خه‌لكێ هه‌رێما كوردستانێ و جيهانێ پشت راست كر كو ئه‌و پێشكه‌فتنا به‌رى نوكه ل ده‌ڤه‌رێن مادێ 140 داعش ب ده‌ست ڤه ئينايى، دووباره نابيت و ئێدى ناهێلن چو پێشڤه‌چوونا ل ده‌ڤه‌رێن كوردى بكه‌ن.
فەرماندێ فەرماندەیا “سپیلک” گۆتژى: “ئەم چاڤەرێ فه‌رمانا جەنابێ سەرۆک بارزانی، فەرماندێ ھێزێن چەکدار ل هه‌رێما كوردستانێ دكه‌ين، هه‌ر ده‌ما بڕيارا وى هات، هه‌كه خوه ب چ ره‌نگ بيت و بۆ چو مه‌ره‌م بيت دێ بجهـ ئينين، چونكو ئه‌و ده‌سكه‌فتێن پێشمه‌رگه‌يى ب ده‌ست ڤه ئيناين، ژ ئه‌گه‌رێ پلانێن سه‌ركه‌فتى يێن جه‌نابێ سه‌رۆك بارزانى بووينه”.
ب گۆره‌يى ئه‌و زانياريێن تارق سلێمان هه‌رنى به‌حس لێ دكه‌ت پشتى كونترۆلكرنا تلسقوف ژ لايێ هێزێن پێشمه‌رگه‌يى ڤه، هه‌تا نوكه زێده‌ترى 300 كه‌سان وه‌كو خوبه‌خش ل گه‌ل هێزێن پێشمه‌رگه‌يى د ئاماده باشيێ دا نه بۆ هه‌ر بڕياره‌كا بۆ ڤى ميحوه‌رى بچيت.
ده‌رباره‌يى پشته‌ڤانيا هه‌ڤپه‌يمانان ژى گۆت: “هه‌ر ده‌ما بزانن داعش هاتنوچوونێ دكه‌ت، فرۆكێن شه‌رى يێن هه‌ڤپه‌يمانان ئاگه‌هدار دكه‌ن و ئه‌و ژى ب دژوارى وان ده‌ڤه‌ران بۆردومان دكه‌ن”.
ل دۆر چه‌كێ نوكه د ناڤ ده‌ستێ وان ژى دا، دا زانين كو وه‌لاتێن هه‌ڤپه‌يمان نوكه ئه‌و چه‌ك ب پێشمه‌رگه‌يى دايه كو دژى ترۆمبێل و هه‌مه‌ران ب كار بينن.
هه‌رنى نه‌ڤه‌شارت ژى كو خه‌لكێ ده‌ڤه‌رێن بن ده‌ستێ وان ب كورد و عه‌ره‌ب و مه‌سيحى و كوردێن ئێزدى ڤه گه‌له‌ك هاريكاريا وان دكه‌ن و ب تايبه‌ت ژى ژ لايێ جۆگرافيا ده‌ڤه‌رێ ڤه
نوكه ب گۆره‌يى ئه‌و پێزانينێن هه‌ين، چه‌كدارێن داعش خه‌لكێ وان گوندێن ده‌وروبه‌ران ڤه‌گوهاستينه ناڤ تلكێف دا كو ژ هێرشێن فرۆكه و تۆپباران پێشمه‌رگه‌يى د پاراستى بن.