فه‌يسبۆك: داتايێن 29 مليۆن كه‌سان هاتينه دزين
ئەڤرۆ نیوز:
کۆمپانیا فەیسبۆک راگەھاند کو ھاککەر شیاینە بچنە ناڤ داتایێن 29 ملیۆن بکاربەران.
ئەڤ راگەھاندنا فەیسبۆکی د دەمەکی دایە، ھەیڤا بۆری کۆمپانیێ راگەھاندبوو کو ھێرشەکا ئەلکترۆنی کریە سەر تۆڕا جڤاکی و ژ ئەگەرێ وێ چەندێ 50 ملیۆن ئەکاونت کەفتینە بن کارتێکرنا ھێرشێ.
گای رۆز، جێگرێ سەرۆکێ پشکا رێکخستنا بەرھەمێ کۆمپانیێ ئاشکەرا کریە کو ژمارا وان ئەکاونتێن کەفتینە بن کارتێکرنا ڤێ ھێرشا ئەلکترۆنی کێمترە ژ یا وان پێشبینی کری.
ب گۆرەیی راگەھاندنێ ئەڤ 29 ملیۆن ئەکاونتە پشکەکن ژ 50 ملیۆن ئەکاونان کو کۆمپانی د وێ باوەریێ دابوو کو کەفتینە بن کارتێکرنا ھێرشا ئەلکترۆنی و ھاککەر چووینە ناڤ ئەکاونتێن داتایێن کەسێن بکارئینەر.
ل دووگ گۆتنا کۆمپانیا فەیسبۆک، ھاککەر د رێیا ڤەکرنا تایبەت یا پشکا “ڤیۆ ئاس View As یا فەیسبۆکی شیاینە بچنە ناڤ پشکێن دی.
فەیسبۆک دانپێدان ب وێ چەندێ کریە کو ژ بەر لاوازیا سیستەمی و ئەوێ چەندێ کو بکاربەر بێ دووبارە نڤیسینا پاسۆردی دشێن بچنە ناڤ ئەکاونتان، ژ بەر ھندێ بوویە ئەگەرێ وێ چەندێ کو ھێرشبەر بشێن بچنە ناڤ وی سیستەمێ فەیسبۆکی.
