فوئاد حسێن:كورد دێ 10 كورسيان ژده‌ست ده‌ن
ئه‌ڤرۆنيوز:
سه‌رۆكێ ديوانا سه‌رۆكاتيا هه‌رێما كوردستان راگه‌هاند، ژبه‌ر وێ ره‌وشا ل ده‌ڤه‌رێن كوردستانى يێن ل ده‌رڤه‌ى ئيدارا هه‌رێما كوردستانێ دروستبووى، دهه‌لبژارتنێن ڤێ جارێ دا كورد دێ نێزيكى 10 كورسيان ل وان ده‌ڤه‌ران ژده‌ست ده‌ن.
فوئاد حسێن، سه‌رۆكێ ديوانا سه‌رۆكاتيا هه‌رێما كوردستانێ دچارچۆڤێ پشكداريێ دكونفرانسێ كوردستان پشتى داعشێ كو ل پاريس پايته‌ختێ فه‌ره‌نسا دهێته ئه‌نجامدان، گۆتاره‌ك پێشكێشكر وبه‌حسێ هه‌لبژارتنێن بهێت يێن عيراقێ وپشكداريا كوردان ودروستگرنا هه‌ڤپه‌يمانيان پشتى هه‌لبژارتنان كر بۆ پێكئينانا حوكمه‌تا نوو يا عيراقێ.
ب ديتنا فوئاد حسێن، ژبه‌ر وێ ره‌وشا ل ده‌ڤه‌رێن ناكۆكى ل سه‌ر هاتيه دروستكرن پشتى روودانێن 16 ئوكتۆبه‌رێ، كورد دێ نێزيكى 10 كورسيان ل وان ده‌ڤه‌ران ل هه‌لبژارتنێن جڤاتا نوونه‌رێن عيراقێ ل 12/5/2018 ژده‌ست ده‌ن، به‌لێ دبێژيت هه‌كه كورد ل شوونا 63 كورسيان، 50 كورسى ژى هه‌بن، هه‌ر دشێ رۆلێ كاريگه‌ر د جڤاتا نوونه‌رێن عيراقێ دا هه‌بيت.
سه‌رۆكێ ديوانا سه‌رۆكاتيا هه‌رێما كوردستانێ دوى كونفرانسى دا گۆت” بێگومان قۆناغا هه‌لبژاتنان گه‌له‌ك يا گرنگه وبۆ مه ژى يا گرنگه، چونكى هه‌موو حزبين سياسى يێن عيراقى هزر دوێ چه‌ندێ دا دكه‌ن كو هه‌ڤپه‌يمانيێ دروست بكه‌ت بۆ وێ چه‌ندێ پێكڤه بشێن حوكمه‌ته‌كا نوو دروست بكه‌ن، ب ديتنا مه كورد دشێن ئێك ژ بلۆكێن سه‌ره‌كى بن دناڤ جڤاتا نوونه‌رێن عيراقێ دا”.
