فوئاد حسێن بریاره‌كێ دبه‌رژه‌وه‌ندا هه‌رێما كوردستانێ دا ده‌ردكه‌ت
ئه‌ڤرۆنیوز:
لژنا ئابووری ل جڤاتا وه‌زیرێن عیراقێ ب سه‌رۆكاتیا فوئاد حسێن وه‌زیرێ دارایی یێ عیراقێ بریارا هه‌لوه‌شاندنا خالێن گۆمركی دناڤبه‌را هه‌رێما كوردستانێ وبه‌غدا ده‌ركر، هه‌ڤده‌م باج ورسومات ل هه‌موو ده‌رگه‌هێن سنوری یێن عیراقێ ب هه‌رێما كوردستانێ دێ هێنه یه‌كخستن.
ل دووڤ رۆهنكرنه‌كا نڤیسینگه‌ها جێگرێ سه‌رۆك وه‌زیران بۆ كاروبارێن ئابووری ووه‌زیرێ دارایی یێ عیراقێ، فوئاد حسێنی سه‌رۆكاتیا كۆمبوونا لژنا كاروبارێن ئابووری ل جڤاتا وه‌زیرێن عیراقێ ب به‌رهه‌ڤبوونا وه‌زیرێن( پلاندانانێ، بازرگانی، پیشه‌سازی وچاندنێ) وپارێزگه‌رێ به‌نكا ناڤه‌ندی یا عیراقی ونوونه‌رێ وه‌زیرێ په‌ترۆلێ ووه‌زیرێ پلاندانانێ ل هه‌رێما كوردستانێ وهژماره‌كا شیره‌تكار ورێڤه‌به‌رێن گشتی یێن په‌یوه‌ندیدار كر.
دوێ رۆهنكرنێ دا هاتیه كو لژنا ناڤبری بریار دا باج ورسوماتێن گۆمركی ل هه‌موو ده‌رگه‌هێن سنوری یێن عیراقێ وهه‌رێما كوردستانێ بهێته یه‌كخستن كو ڤێ بریارێ گرنگیا خوه یا ئابووری یا هه‌ی وچالاكیێن بازرگانی دێ رێك ئێخیت.
هه‌روه‌سا لژنا ناڤبری خالێن چاڤدێریێ ووردبینیێ یێن گۆمركی یێن نوكه ل (فه‌یدیێ، شێراوه ل باكوورێ كه‌ركووكێ، له‌یلان ل رۆژئاڤایێ كه‌ركووكێ) هه‌لوه‌شاندن كو ئه‌ڤ چه‌نده ژی دێ بازرگانیا ناڤخوه‌یی چالاك كه‌ت.
