فوئاد عەبدوللا: هونەر ل دەف من ئامرازێ شکاندنا بێ دەنگیێ یە
زاخۆ، دلۆڤان هالۆ:
هونەرمەندێ پەیکەرساز فوئاد عەبدوللا، د دیدارەکێ دا بۆ ڕۆژناما ئەڤرۆ دیارکر کو ئەز ل سلا 19٨٤ ژ دایكبوویمە. من بەشێ پەیکەرسازی ل پەیمانگەها هونەرێن جوان خواندیە.
من بەشداری د ٥٤ پێشانگەهێن هەڤپشك دا کرینە کو ژ نافخوە و دەرڤەی کوردستانێ بووینە. ئەڤە بۆ ماوێ 16 سالانە ئەز کارێ هونەری یێ پەیکەرسازیێ دکەم. چەندین پەیکەرێن من ل جهێن گشتی یێن کوردستانێ هاتینە دانان. ئەز مامۆستایێ وانا هونەری مە.
ناڤهاتی ئاماژە ب وێ چەندێ ژی کر کو هونەر ل دەف من ئامرازێ شکاندنا بێ دەنگیێ یە. من بەردەوام پێکۆل کریە کو مرۆڤ و کەرەستەیێن ڕەق بکەمە زمانەك بۆ ڤەگێڕانا وان داستان و ڕوودانێن مێژوویی یێن ب سەر مللەتێ مە یێ کورد هاتین. کارێن من یێن هونەری گەڕیانەکا بەردەوامە ل دووڤ تێکەل کرنا هێمایێن کەلتووری و ناسناما نەتەوەیی د قالبەکێ هەڤچەرخ دا، داکو ب ڤێ ڕێکێ بشێم خەم و ژانێن کەسێن ڤی وەلاتی بگەهینمە هەموو جهان.
فوئادێ پەیکەرساز دبێژیت:»من خەلاتێ ئێکێ ل سەر ئاستێ هونەرمەندێن کوردستانێ ب دەستڤەئینایە. خەلاتێ دووێ ل سەر ئاستێ هونەرمەندێن کوردستان و ئیراقێ ب دەستڤە ئینایە. خەلاتێ ئێکێ ل دووەمین پێشانگەها نێڤدەولەتی یا عەفرین ل ئەلمانیا ب دەستڤەئینایە کو ٤0 هونەرمەندان ل 12 وەلاتان بەشداری د ڤێ پێشانگەهێ دا کربوون».
گۆت ژی:»ب ڕێکا دروستکرنا پەیکەران من دڤێت بێ دەنگیا مێژوویێ بشکێنم و برینان بکەمە زمانێ دیتنێ. پەیکەر ڕێکەکا تایبەتە کو مرۆڤ دەمێ بووری نوو بکەت. پەیاما من ب دروستکرنا پەیکەرێ شەهیدەکێ یان هۆزانڤانەکێ ئەوە کو ئەز دیار بکەم هێشتا مێژوویا گەلێ مە یا زیندی یە، و دناڤ ماددەیێن پەیکەران دا هەناسەیێ ددەت».
زێدەتر ژی گۆت:»دروستکرنا هەر پەیکەرەکێ وەکو نڤیسنا پەیڤ و ڕستەیانە ل دەڤ نڤیسەری کو ئەگەر شارەزایی نەبیت نەشێت ئەو ئێشا کو هەست پێ دکەت ب شێوەیەکێ دروست بکەتە دناڤ مادەیێن پەیکەری دا. پەیکەرێن من ژ ڕەهەندێن مرۆڤایەتی و نەتەوەیی و فەلسەفی پێك دهێن».
