فوئاد مه‌عسووم داخۆيانيه‌كێ ل دۆر هه‌رێما كوردستانێ ره‌ت دكه‌ت
ئه‌ڤرۆنيوز:
ئه‌ڤرۆ سێشه‌مبى 26/12/2017، نڤيسينگه‌ها سه‌رۆك كۆمارا عيراقێ فوئاد مه‌عسووم، رۆهنكرنه‌ك ل دۆر داخۆيانيه‌كا عه‌بدوله‌تيف ره‌شيد شيره‌تكارێ سه‌رۆك كۆمارى به‌لاڤكر وتێدا راگه‌هاند كو لێدوانا وى شيره‌تكارێ مه‌عسوومى بۆ رۆژناما (الصباح الجديد) بوچوونا وى يا كه‌سايه‌تى يه وچو په‌يوه‌ندى ب هه‌لويستێ سه‌رۆكاتيا كۆمارێ ڤه نينه.
دوهى دوشه‌مبى، عه‌بدوله‌تيف ره‌شيد شيره‌تكارێ فوئاد مه‌عسوومى دداخۆيانيه‌كێ دا بۆ رۆژناما (الصباح الجديد) يا به‌غدادى، هێرش كربوو سه‌ر حوكمه‌تا هه‌رێما كوردستانێ وگۆتبوو كو حوكمه‌تا هه‌رێمێ نوونه‌راتيا خه‌لكێ كوردستانێ ناكه‌ت، هه‌روه‌سا گۆتبوو سه‌رۆك مه‌سعود بارزانى كاروبارێن هه‌رێما كوردستانێ ب رێڤه‌دبه‌ت.
دبه‌يانناما نڤيسينگه‌ها سه‌رۆك كۆمارا عيراقێ دا هاتيه” ئه‌ڤ داخۆيانيا عه‌بدوله‌تيف ره‌شيد، بوچوونا تايبه‌تى يا وى يه وچو په‌يوه‌ندى ب هه‌لويستێ فه‌رمى وبوچوونا سه‌رۆك كۆمارى نينه”.
سه‌رۆكاتيا كۆمارێ دياركر ژى” هه‌موو بوچوون وهه‌لويستێن سه‌رۆكاتيا كۆمارێ دمالپه‌رێ وێ يێ ئه‌لكترۆنى وداخۆيانيێن سه‌رۆك كۆمارى بۆ ده‌زگه‌هين راگه‌هاندنێ به‌لاڤ دكه‌ن”.
