فوئاد مه‌عصوم: يا گرنگ ئێك پارچه‌يا ئاخا عيراقێ يه
ئه‌ڤرۆ نيوز:
فوئاد مه‌عصوم سه‌رۆك كۆمارێ عيراقێ و سه‌ركردێ ديارێ ئێكه‌تى نشتيمانى كوردستان ل ئوردن راگه‌هاند كو ئێكپارچه‌يا ئاخا عيراقێ بۆ وى يا گرنگه و دا زانين ژى كو چو بۆچوون نينن بۆ پاشخستنا هه‌لبژارتنێن جڤاتێن پارێزگه‌هان.
رۆژناما غه‌د يا ئوردنى ژ زارده‌ڤێ فوئاد مه‌عصوم، سه‌رۆك كۆمارێ عيراقێ به‌لاڤكريه، سه‌رۆك كۆمارێ عيراقێ د ديداره‌كێ دا ل گه‌ل ژماره‌كا رۆژنامه‌ڤانێن عيراقى و ئوردنى گۆت: “ئه‌وا ل ده‌ف مه گرنگ ئێكپارچه‌يا ئاخا عيراقێ يه، د ده‌مه‌كى دا هه‌كه كوردان ده‌نگ ژى ل سه‌ر راپرسيێ دا، وى ده‌مى دێ چه‌ند تشتێن كاريگه‌ر مينن، ژ وان ژى كاودانێن هه‌رێمێ و ده‌ڤه‌رێن كێشه ل سه‌ر هه‌ين و چه‌ند تشتێن دى”.
ده‌رباره‌ى پاشخستنا هه‌لبژارتنان ژى فوئاد مه‌عصوم خۆيا كر كو هزرا پاشخستنا هه‌لبژارتنا پارێزگه‌هان ب چو ره‌نگه‌كى د رێ دا نينه، “هيڤيدارم هه‌لبژارتنێن داهاتى يێن جڤاتا نوونه‌رێن عيراقێ كو بڕياره ل سالا بهێت بهێنه ئه‌نجام دان، ل سه‌ر بنه‌مايێ هه‌ڤنشتيمانى بوونێ بن و د دوور بن ژ جودابوونا تايفه‌گه‌رى”.
ئه‌ڤه د ده‌مه‌كى دايه كو دوهى رۆژا پێنجشه‌مبى 18ى گۆلانا 2017ێ فوئاد مه‌عصوم سه‌رۆك كۆمارێ عيراقێ ژ بوو پشكداريكرنێ د كوربه‌ندێ ئابووريێ جيهانى ل رۆژهه‌لاتا ناڤه‌راست و باكوورێ ئه‌فريقيا گه‌هشته عه‌ممان يا پايته‌ختێ ئوردن.
