فڕۆكەیێن توركیا ب دژواری چەندین جهێن جودا ل دەڤەرا ئامێدیێ بۆردومانكرن
ئامێدیێ، مەحمود نهێلی:
فڕۆكەیێن شەڕكەرێن توركیا چیایێ مەتینا ل هنداڤی سەنتەرێ ناوچەداریا دێرەلۆكێ و گوندێ سگێرێ ل دەڤەرا نهێلێ دوهی ئێڤاری ١٤/٤/٢٠٢٤ چەندین جاران ب دژواری بۆردومانكرن.
ل دووڤ ئاخڤتا وەلاتیەكێ ئاكنجیێ سەنتەرێ ناوچەداریا دێرەلۆكێ بۆردومانا ڤێجارێ هند یا نێزیك بوویە خانیێن وانا هژیاینە و گۆت: «هەر چەندە ڤێ بۆردومانێ چ زیانێن ماددی و گیانی نەبووینە، لێ ژ بەر دەنگێ وانا یێ ب هێز ترس و دودلی ئێخستیە د دلێ خەلكێ دەڤەرێ دا».
هەروەسا دوهی ئێڤاری گوندێ سگێرێ و دەوروبەرێن گوندێ سەرگەلێ ژ لایێ فڕۆكەیێن لەشكرێ توركیا ڤە هاتنە بۆردومانكرن.
ئەڤە د دەمەكێ دایە ئەڤ دەڤەرە ب بەردەوامی ژ لایێ توپخانە و فڕۆكەیێن توركیا ڤە دهێتە بۆردومانكرن، كو نوكە دەمێ گیایێ بهارێ یە و ئەڤ بۆردومانە بوویە ئەگەرێ هندێ، وەلاتی نەشێن بچنە گیایی و نەشێن بچنە سەر گوندێن خوە ژ بۆ ئینانا بەرهەمێن چیایی و چاندنێ.
