فۆڕمێن دو ھزار کرێدارێن دھۆکێ گەھشتینە وەزارەتا باژێڕڤانی
ئەڤرۆ نیوز:
سەرۆکێ کۆمەلا بەڕەڤانیکرن ژ مافێن کرێداران راگەھاند، ب تنێ ل پارێزگەھێن ھەولێر و دھۆکێ 20 ھزار فۆڕمێن کرێداران بۆ وەزارەتا باژێڕڤانی ھاتینە بلندکرن و پێشبینی دکەین د ئەڤ سالە دا پارچێن ئەردی ب سەر وەلاتیان دا بھێنە بەلافکرن، ھەروەسا ئاشکراکر، رەوشا کرێکاران زۆر یا خراپە و کرێدارێن گەنج ژبەر نەبوونا کریێ مالێن خوە تێکەلی مالبابا خوە دکەن. سەرۆکێ کومەلا کرێداران ژی راگەھاند، ھەتا 80 ھزار کرێداران ل ھەرێمێ ھەنە.
مەحموود ئیسماعیل، سەرۆکێ کۆمەلا بەڕەڤانیکرنی ژ مافێ کرێداران ل پارێزگەھێن ھەولێر و دھۆکێ بۆ رۆژناما ئەڤرۆ گۆت “پشتی بڕیارا سەرۆکاتیا جڤاتا وەزیران بۆ بەلاڤکرنا پارچێن ئەردی، داخواز ژ کۆمەلا کرێداران ھاتەکرن فۆڕمێن وەلاتیێن کرێدار بۆ وەزارەتا باژێڕڤانی بھێنە بلندکرن، د دەمێ ھەیڤەکێ دا ئەم شیان ب تنێ ل سنورێ ھەردو پارێزگەھێن ھەولێر و دھۆکێ نێزیکی 20 ھزار فۆڕمان بدەینە وەزارەتا باژێڕڤانی، ژ وانا پتری 17 ھزار فۆڕم یێن کرێدارێن پارێزگەھا ھەولێرێ بوون و دو ھزار فۆڕم یێن کرێدارێن پارێزگەھا دھۆکێ بوون، بەلێ ئەڤە رامانێ ڤێ چەندێ نادەت ب تنێ 20 ھزار کرێدار ل ھەولێر و دھۆکێ ھەنە.
زێدەتر گۆت: رێژەیا کرێداران زۆرترە و ھێشتا کار ل سەر دھێتەکرن، لێ وەزارەتێ ھەیڤەک دەلیڤا دابوو کۆمەلێ و ئەم شیان ڤێ ھژمارا بلند بکەین بۆ وان، بڕیارا بەلاڤکرنا ئەردی جھێ دەستخۆشی و سوپاسیا حوکمەتێ دکەین، بەردەوام مە دووڤچوون بۆ ڤێ پرسێ کریە و پێشبینی دکەین د ئەڤ سالە دا پارچێن ئەردی ل گۆرەی خالان بھێنە بەلافکرن”.
مەحموودی گۆت ژی” نوکە حوکمەت یا کار بۆ کێمکرنا کریا خانی و ئاڤاھیان دکەت و ئەم ژی پشتەڤانیا ڤێ پێنگاڤێ دکەین و لیژنەکا تایبەتمەند بۆ کێمکرنا بھایێ کریێ ژ لایێ حوکمەتێ ڤە ھاتیە پێکینان و کریا خانیان دێ گۆرەی بازاڕێ نوکە و قەیرانا دارایی ھێتە دیارکرن”.
سەرۆکێ کۆمەلا بەڕەڤانیکرنی ژ مافێ کرێداران ئاشکرا کر، بێگومان د دەمێ نوکە دا و ڤێ قەیرانێ دا رەوشا وەلاتیێن کرێدار ل ھەموو وەختەکی خراپترە، رۆژانە ژلایێ کرێداران پەیوەندی ب کۆمەلێ دھێتەکرن، کو چەند ھەیڤە کرێکارا کریا خانی نەدایە و زۆر ژ خوەدیێن خانیان گەفێن چۆلکرنێ ل کرێداران دکەن.
ھەروەسا دبێژیت: پشتی قەیرانا دارایی کوور بووی، دیاردەیەکا مەترسیدار پەیدابوویە، ئەو ژی د دەمێ نەبوونا کریێ ھژمارەک کرێدارێن گەنج خانی چۆلکرینە و مالێن خوە دگەل مالبابا خوە تێکەلکریە، ئەڤە ژی جھێ دلگرانیێ یە، ژ بەر کو د دەمێ دووبارە جودابوونێ مەزاختی پێدڤینە بۆ وەلاتیان و تەخا گەنجان.
سەرۆکێ کومەلا کرێدارێن ھەرێما کوردستانێ دیار کر، ھەتا ھەشتێ ھزار خێزانان کرێدارن ل ھەرێما کوردستانێ ھەنە و ئەڤە ژ بەر کاودانێَن نوکە کوردستان تێدا، کەس ھەبووینە خوە کوشتینە یان سوتینە پێخەمەت دەربازبوون ژ کاودانان.
بەرھەم عەلی، سەرۆکێ کۆمەلا کرێدارێن ھەرێمێ گۆت: مە ژ حوکمەتا ھەرێما کوردستانێ خواستیە ب زووترین دەم قانوونا تایبەت ب کرێداران ڤە بھێتە راستڤەکرن کو تایبەت ب کرێداران ڤە کو ل گەل کاودانێن نوە کوردستان تێدا دبوریت ب گونجیت و کار بھێتەکرن ل سەر کوالێتی و جھێ خانی و خودانێ خانی و جھی نەیێ ب دلێ خوە بیت بۆ گرانکرنا کرێیان، دیسا مە خواستیە ب زووترین دەم پارچە زەڤی بھێنە دابینکرن بۆ کرێداران و ب سوپاسی ڤە نوکە وەزارەتا باژێرڤانیێ یا کاری ل سەر ڤێ چەندێ دکەن و ب ھیڤی نە ب زووترین دەم پارچە زەڤی ب رێیا کۆمەلا مە بۆ کرێداران بھێنە دابینکرن.
سەرۆکێ کومەلا کرێداران ھێشتا ژی گۆت: ھەتا 80 ھزار کرێدران ل ھەرێمێ ھەنە و ئەڤە بەر ب زێدەبوونێ بوون، چونکە ماوەک بۆ حوکمەتا ھەرێما کوردستانێ بەلاڤەکرنا پارچە زەڤیان راوستاندی و دیسان ژبەر کاودانێن نوکە کوردستان کەفتیە تێدا ب مخابنی ڤە گەلەک کەسان خوە سوتن و کوشتن، چونکو کاودان گەلەک بەرتەنگ بووینە و ھەکە حوکمەت ب زووترین دەم ڤان کاودانان کونترۆل نەکەت، مەترسی گەلەک ھەنە کو ئەڤ سالە قەیران گرانتربیت و ئێدی کونترۆل نەمینت، ھەتا نوکە دو ئافرەتان خوە سوتینە و مامۆستایەکی خوە سێدارە دایە.
ھێشتا گۆت: پێدڤی یە حوکمەت ب زووترین دەم پرۆژێ خوە یێ چاکسازیێ ب راگەھینت و ئەڤە د بەرژەوەدا تەخا ھژار دابیت و دیسان ئەو شوقێن ئاڤاکرین بۆ کێم دەرمەتان دابەش بکەن، ھەتا رادەکی پشتی زڤرینا ئاواران بۆ سەر جھێن وان و دیسا گەلەک چوونە دەرڤە کرێَ ئەرزان بووینە، لێ نەبوونا مۆچان و کێم بوونا پاران ھەر بارگرانی چێکریە و دڤێت حوکمەت پێنگاڤان ب ھاڤێژیت.
