فیسته‌ڤالا گه‌شت و گوزارێ ل ئامێدیێ دێ هێته ئه‌نجامدان
ئامێدیێ، مه‌حمود نهێلی:
ل ژێ ناڤێ به‌ره‌ڤ گه‌شت و گوزاره‌كا سه‌رده‌میانه، سوبه‌هی رۆژا پێنجشه‌مبی 2/6/2022 فیسته‌ڤالا قوبه‌هان یا ئێكێ یا گه‌شت و گوزاری ل ئامێدیێ دێ هێته ئه‌نجامدان و بۆ ده‌مێ دو رۆژان دێ یا به‌رده‌وام بیت.
مراد محه‌مه‌د ئامێدی ل په‌یمانگه‌ها ته‌كنیكی یا ئامێدیێ بۆ رۆژناما ئه‌ڤرۆ دیار كر، زانكۆیا پولیته‌كنیك یا دهۆكێ ب هه‌ڤكاری ل گه‌ل رێڤه‌به‌ریا گشتی یا گه‌شت و گوزارێ ل پارێزگه‌ها دهۆكێ دێ ڤێ فیسته‌ڤالێ و دیدارا قوبه‌هان یا گه‌شت و گوزاری ل ئامێدیێ ئه‌نجام ده‌ن و گۆت: “ئه‌ڤ دیدار و فیسته‌ڤالا قوبه‌هان یا ئێكێ یه یا گه‌شت و گوزارێ، كو ل ئامێدیێ بهێته ئه‌نجامدان، رۆژا ئێكێ فیسته‌ڤال ل سه‌نته‌رێ ده‌ڤه‌رداریا ئامێدیێ دێ هێته ئه‌نجامدان و چه‌ندین ته‌وه‌ر و بابه‌تێن گرنگ ب ئاماده‌بوونا كه‌سانێن شاره‌زا د ڤی بیاڤی دا دێ هێنه به‌حسكرن و رۆژا دویێ ژی 3/6/2022 دێ یا به‌رده‌وام بیت”.
گۆتژی: “مه‌ره‌م ژ ڤێ فیسته‌ڤالێ پێشخستنا كه‌رتێ گه‌شت و گوزاری یه ل ئامێدیێ، دیسا بڕیاره ئه‌ڤ فیسته‌ڤاله سالانه یا به‌رده‌وام بیت و ل ده‌ڤه‌رداریا ئامێدیێ بهێته ئه‌نجامدان”.
