فەرماندەکێ ئەمریکی: داعش دێ دەست ژ ھندەک رەخێن مووسلێ بەردەت
ئەڤرۆ نيوز:
پشتی شکەستنێن داعش یێن ڤێ دووماھیێ ل سەر دەستێ ھێزێن پێشمەرگەی و ئازادکرنا چەندین گۆندێن دەروبەرێ مووسلێ و نێزیکبوونا پێشمەرگەی ژ باژێرێ مووسلێ و ئازادکرنا گەیارە ژی ژلایێ لەشکرێ عیراقی ڤە، گوھۆڕین دداخۆیانیێن فەرماندێن لەشکری یێن ھەڤپەیمانیا نێڤدەولەتی دا ل دۆر ژڤانێ ئازادکرنا مووسلێ و ئاماژێ ددەن کو ل دەمەکێ نێزیک مووسل دێ ھێتە پاقژکرن ژ داعشێ، پشتی کو بەری نوکە دداخۆیانیێن وان دا ژڤانێن دوور بۆ ئازادکرنا وی باژێری دھاتنە دەستنیشانکرن.
دووماھی داخۆیانیا فەرماندێن ھەڤپەیمانیا نێڤدەولەتی دژی داعشێ ل دۆر ژڤانێ ئازادکرنا مووسلێ، داخۆیانیا فەرماندێ فەرماندەیا ناڤین یا لەشکرێ ئەمریکی جەنەرال (جوزێف فوتیل) دکۆنگرەکێ رۆژنامەڤانی دا ل بارەگایێ وەزارەتا بەرگریا ئەمریکی دەمێ گەشبینیا خوە دیارکری کو مووسل بەری دووماھیا سالا 2016 ێ دێ ھێتە ئازادکرن و ئاماژە دا کو شەڕێ ئازادکرنا مووسلێ دێ شەڕەکێ ڤەبڕ بیت، بەلێ دێ گەلەک یێ ب زەحمەت بیت و تیرۆرستێن داعشێ دێ رێژەکا مەزن یا تەقەمەنیان چینن و خوە ل پشت وەلاتیێن سڤیل ڤەشێرن.
ڤی فەرماندێ ئەمریکی بەحسێ رۆلێ کاریگەرێ پێشمەرگەی د ئازادکرنا مووسلێ دا کر و گۆت” ھێزێن پێشمەرگەی دێ پشکداریێ د ئازادکرنا مووسلێ دا کەن و ئەم ل گەل سەرۆکێ ھەرێما کوردستانێ مەسعود بارزانی ل دۆر ڤێ چەندێ یێن ئاخڤتین.
جەنەرال فونتیل خویاکر ژی کو نوکە چەکدارێن داعشێ پێگیریێ ب فەرمانێن سەرکردێ خوە (ئەبو بەکر بەغدادی) ناکەن و داعش دێ نەچاربیت بڕیار ب زەحمەت دەت ل دۆر ھندەک دەڤەرێن دێ بەرگریێ ژێ کەت و پێشبینیێ دکەت کو تیرۆرستێن داعشێ ددەمەکێ کورت دا دەست ژ ھندەک دەڤەرێن باژێرێ مووسلێ بەردەن و پتر بەر ب دەڤەرێن داھات بۆ ژێ دھێت و دەڤەرێن ستراتیژی بچن ب مەرەما درێژکرنا دەمێ مانا وان.
د ھەمان دەم دا ئاژانسا ئەسوشیتدپرێس راپۆرتەک بەلاڤکریە ژناڤ باژێرێ مووسلێ و تێدا نەمانا مۆرالێن تیرۆرستێن داعشێ بەرچاڤ دکەت پشتی وان شکەستنێن مەزن یێن چەکدارێن داعشێ تووش بووینێ ل ھەموو بەرەیێن شەڕی، ئاژانسا ناڤبری دیارکریە ژی کو رێکخستیا داعش یا تیرۆرستی چەکدارێن خوە یێن سنێلە ل جادێن مووسلێ یێن بەلاڤکرین ب تایبەتی پشتی شکەستنێن ڤێ دووماھیێ یێن وێ رێکخستیا تیرۆرستی و ھەموو چەکدارێن خوە یێن رێزا ئێکێ و تایبەت یێن ئیناینە دناڤ باژێرێ مووسلێ دا ل دووڤ پلانەکا نوو یا بەلاڤکرنا ھێزێن خوە و پتریا چەکدارێن وێ یێن تایبەت ژی یێن خوە بەرھەڤ دکەن بۆ رەڤینێ بەر ب سووریێ.
