قائیمقامێ شنگالێ: مە نەڤێت چو ھێزێن دی ل شنگال دەستەلات ھەبیت
ئه‌ڤرۆ نيوز:
مەحما خەلیل قائیمقامێ قەزا شنکالێ دەربارەی ئاڤاکرنا شنگالێ و دەرکەفتنا ھێزێن پەکەکێ بۆ رۆژناما ئەڤرۆ دیارکر: ھەر ژ دەستپێکا ھاتنا ھێزێن پەکەکێ بۆ شنگالێ و ھەتاکو نوکە پەکەکێ گەلەک کچ و زارۆکێن شنگالێ برینە و تەڤلی ھێزێن خوە کرینە، ھەر چەندە خەلکێ شنگالێ ژی گازندا ژ ھندێ دکەن کو پەکەکێ زارۆک و کچێن وان برینە، لێ ھەتاکو نوکە چو داتایێن دورست ل بەر دەستێ مە نینن، کا ھژمارا وان کچ و زارۆکا چەندە یێن پەکەکێ برین.
قائیمقامێ شەنگالێ ھەروەسا گۆت: ئەڤا پەکەکە دکەن خەلکێ شنگالێ پێ نەخۆشە و ھەروەسا خەلکێ وێ قەبوول ناکەن کو چو لایەنێن دی ژبلی حوکمەتا ھەرێما کوردستانێ دەستھەلاتێ ل شنگالێ بکەن و خەلکێ شنگالێ داخواز دکەن کو ھێزێن پەکەکێ ژ شنگالێ دەرکەڤن،ھەروەسا دڤێت پەکەکێ ژی ئەو رێزگرتن ھەبیت و نەمیننە ل شنگالێ،ھەر چەندە پەکەکێ ژی بەرھەڤیا خوە دیارکریە،لێ نە یا دیارە کادێ کەنگی ھێزێن وان ژ شنگالێ دەرکەڤن؟.
ناڤھاتی دیارکر ژی: شنگال دێ ھێتە ئاڤاکرن و بەری چەند رۆژان مە سەرەدانا بالیۆزخانەیا ئەمریکا و ئەلمانیا کریە ل بەغدا و وان سۆز دایە مە کو ئەو دێ شنگالێ ئاڤاکەن و دێ پرۆژێن ئیستیراتیجی ژی بۆ خەلکێ شنگالێ ئەنجام دەن،ھەروەسا بالیۆزخانا ئەمریکا وەسا دیارکریە کو ئارامیا دەڤەرا شنگالێ گرێدایە ب ئارامیا عێراقێ ڤە و لەورا ھەتاکو شنگال ئارام نەبیت عێراق ژی ئارامیێ ب خوەڤە نابینیت،مەحما خەلیل قائیمقامێ قەزا شنگالێ زێدەتر گۆت:ھەموو پێنگاڤ ژلایێ حوکمەتا ھەرێا کوردستانێ ھاتینە ھاڤێتن بۆ ئاڤاکرنا شنگالێ و نوکە ماستەر پلانەکا ب رێک و پێک ھاتیە دانان،کو شنگال سەر ژنوو ڤە بھێتە ئاڤەدانکرن، ھەروەسا نوکە ھەلویستێ حوکمەتا عێراقێ ژی ژ بەری نوکە چێترە و وان ژی گۆتیە پێدڤیە ھاریکاریا پرۆژێن شنگالێ بھێتە کرن و جارەکادی شنگال بھێتە ئاڤاکرن.
