قارەمانێن مە ژ هەژی زێدەتری دەستخوەشییێ نە
نەهلا ئەحمەد
بێ گومان هەر كارەكێ بێی پشتەڤانی بهێتە كرن دێ سنۆرەك بوو هەبیت و بەردەوام نابیت، ئەڤە لاكێشەیەكا سرۆشتییە دناڤا هەر كارەكی دا و یاسایا ژییانێ یە، چنكو ب خوەبەخشی ڕادەیەك بوو هەیە ل سەر هەر كارەكی، لڤێرە من دڤێت ئەز پێتر بابەتێ خوە رۆهن بكەم ل سەر لایەنێ وەرزشێ و ئەو یاریزانێن بۆ دەما چەندین سالان خوە زەحمەت ددەن و دگەهنە گۆپینكی و دەستڤە ئینانا ناسناڤان لێ دبەرانبەر دا ئەو پشتەڤانییا دارایی و مەعنەوی بۆ نە هێتە كرن دێ گەلەك یا بزەحمەت بیت بەردەوامییێ بدەتە پێشەنگییا خوە، ڕاستە پشتی هەر دەستڤە ئینانا دەستكەڤتەكی دەستخوەشی و پیرۆزباهی لێ دهێتە كرن، لێ ئەو ژ هەژیترە پشتەڤانییا دارایی بۆ بهێتە كرن ژبۆ هندێ ئاستێ خوە باشتر بكەت و بەر ب قارەمانیێن جیهانی بچیت،مە ل پارێزگەها دهۆكێ كۆمەكا باش یا یاریزانێن خودان شیان و قارەمان هەنە ل سەر ئاستێ یاریێن جودا و نموونە یاریێن چەنگی، لەشجوانیێ، تەپا مێزێ، تێنسا ئەردی، كیكبۆكسینگ و هەتا، هەروەسان تیمێن خودان شیان هەنە یێن فوتبۆلێ، باسكێت بۆل و ڤۆلی بۆلێ ل سەر ئاستێ كوڕان و كچان، پێنەڤێت ئەڤە هەموو ب ڤالاهییەكێ نە هاتینە یان ب شەڤ و رۆژەكێ بووینە خودان ئاست و ناسناڤ، بەلكو زەحمەتەكا درێژ یا ڕاهێنانێ و دبیت گەلەك ژ وان خوە بەخشی و ل سەر كیستێ خوە ڕاهێنان و پشكداری كرینە.
مەرەما مە یا دیارە ئەوژی پشتەڤانییا ئەڤان یاریزان و تیمان ب شێوەیەكێ ڕێكخستی بهێتە كرن، نموونە دبێژین یاریزانەك بوو قارەمان ل سەر ئاستێ كوردستانێ، یان ئیراقێ یان نێڤدەولەتی، یا باشتر ئەوە جهێن پەیوەندیدار نە بتنێ سۆپاسی و دەستخوەشیێ لێ بكەت، بەلكۆ ب مێڤانداریكرنا وی یاریزانی و ڕێزگرتنەكا مەعنەوی و دارایی بۆ بهێتە كرن ژبەركو دێ بیتە باشترین پالدەر ئەو هزر د ناسناڤێن مەزنتر دا بكەت، هەروەسان ئەڤ پێنگاڤە ڕێزگرتنە بۆ دەستكەڤتەكی كو دێ بیتە دیرۆكەكا زێڕین یا پارێزگەهێ دناڤا وەرزشێ دا.
خالەكا دی بەرچاڤ، ئەوە دەزگەهێن ڕاگەهاندنێ گرنگییەكا باش ب یاریزانێن پارێزگەهێ بدەت دووڤچوونا بەرهەڤیێن وان بهێتە كرن و دناڤا سۆشیالێن خوە دا چو ب شێوەیێ دیدار یان بابەت پشتەڤانییێ لێ بكەن ژبەركو ئێك ژ خالێن هێزێ بۆ هەر یاریزانەكی پشتەڤانییا ڕاگەهاندنێ یە بۆ پێنگاڤێن وی، هیڤییا مە ئەوە د نێزكترین دەمدا ئەم یاریزانێن خوە ل سەر سێجیێ ناسناڤان ب ئالایێ كوردستانێ ببینن و پشتەڤانیەكا هەرە باش بۆ وان بهێتە كرن.