قاسم ئه‌عره‌جی:هه‌ولێر و به‌غدا یێن گه‌هشتینه قۆناغه‌كا باش یا تێكگه‌هشتنێ
ئه‌ڤرۆ:
دوهی ئێكشه‌مبی نێچیرڤان بارزانی، سه‌رۆكێ هه‌رێما كوردستانێ ل گه‌ل قاسم ئه‌عره‌جی، شیره‌تكارێ ئاسایشا نه‌ته‌وی یا ئیراقێ كۆمبوو.
پشتی كۆمبوونێ قاسم ئه‌عره‌جی ڕاگه‌هاند، تێكگه‌هشتن هه‌بوو ل دۆر گه‌له‌ك دۆسێێن گرنگ یێن په‌یوه‌ندیدار ب ئاسایش و ئێكه‌تیا ئیراقێ، هه‌روه‌سا پاراستنا سه‌روه‌ریا ئیراقێ.
سه‌باره‌ت كۆمبوونا د ناڤبه‌را نێچیرڤان بارزانی و قاسم ئه‌عره‌جی، سه‌رۆكایه‌تیا هه‌رێما كوردستانێ د به‌یاننامه‌یه‌كێ دا دبێژیت” هه‌ردو ئالیان به‌رده‌وامیا هاریكاری و هه‌ماهه‌نگیێ دناڤبه‌را حوكمه‌تا فیدرال یا ئیراقێ و هه‌رێما كوردستانێ بۆ چاره‌سه‌ركرنا كێشه‌یان ل گه‌ل وه‌لاتێن ده‌وربه‌ر باسكرن و دووپاتی ل په‌نابرنێ بۆ دانوستاندنێ و ڕێكارێن دبلۆماسی و تێكگه‌هشتنا هه‌ڤپشك كر بۆ پاراستنا سه‌قامگیری و سه‌روه‌ریا ئیراقێ”.
د به‌یاننامه‌یێ دا هاتیه ژی” هه‌ردو ئالی د هه‌ڤڕا بوون ل سه‌ر گرنگیا هاریكاری و هه‌ماهه‌نگیێ دناڤبه‌را حوكمه‌تا فیدرالی و حوكه‌تا هه‌رێما كوردستانێ بۆ به‌رهنگاریا تیرۆرستان و كونترۆلكرنا سنووران”.
سه‌باره‌ت به‌زاندنا سنووران و پێشێلكرنا سه‌روه‌ریا ئیراقێ ژ ئالیێ ئیرانێ و توركیا ڤه، ئه‌عره‌جی گوت” هیچ به‌زاندنه‌كا سنووری قه‌بوول ناكه‌ین و تێكگه‌هشتن د ناڤبه‌را به‌غدا و هه‌ولێرێ دا یا هه‌ی، لژنه‌یه‌كا بلند دێ هێته دروستكرن بۆ تێكگه‌هشتنێ ل گه‌ل كۆمارا ئیسلامی یا ئیرانێ و توركیا، بۆ دیتنا چاره‌سه‌ریه‌كا گونجای”.
ئه‌عره‌جی دیاركر ژی” سه‌رۆك وه‌زیرێن ئیراقێ، محه‌مه‌د شیاع سودانی، ل ڕۆژا سێشه‌مبی دێ سه‌ره‌دانا ئیرانێ كه‌ت و پرسا سه‌روه‌ریا ئیراقێ دێ ب تێر و ته‌سه‌لی د وێ سه‌ره‌دانێ دا هێته باسكرن”.
