قاسم شەشۆ: دەرگەھێ ئازادکرنا شنگالێ ھاتە ڤەکرن
ئەڤرۆ، لەزگین جۆقی:
فەرماندێ پێشمەرگێن ئێزدی ل چیایێ شنگالێ و کارگێرێ لقێ ١٧ یێ پارتی دیمۆکراتی کوردستان ل شنگالێ بۆ ئەڤرۆ دیار کر کو دەرگەھێ ئازادکرنا شنگالێ ژ خوەکوژێن داعش ھاتە ڤەکرن و گۆت “ئازادکرنا شنگالێ ژ ٢٠ رۆژێن دی نابۆریت و دێ ب ئێکجاری ژ خوەکوژێن داعش ھێتە ئازادکرن، جەنابێ سەرۆکێ ھەرێما کوردستانێ ب شەڤ و رۆژ یێ کار بۆ ئازادکرنا شنگالێ دکەت”.
قاسم شەشۆ، فەرماندێ پێشمەرگێن ئێزدی ل چیایێ شنگالێ ئاشکرا کر، پشتی زومار ژ تیرۆرستێن داعش ھاتیە پاقژکرن، دەرگەھێ ئازادکرنا شنگالێ ژی ھاتە ڤەکرن و گۆت “ئەم پێشبینیێ دکەین ھەتا ٢٠ رۆژێن دی شنگال ژی ژ خوەکوژێن داعش بھێتە ئازادکرن و خەلک ڤەگەرنە سەر مال و مولکێن خوە”.
خویا ژی کر، نوکە تیرۆرستێن داعش شیانێن ھێرشکرنێ نەماینە و گەلەک بزاڤ کرن خوە بگەھیننە چیایێ شنگالێ و مەزارگەھێ شەرفەدین، لێ ھەموو بزاڤێن وان ھاتنە ژناڤبرن و ب سەدان تیرۆرستێن داعش ھاتنە کوشتن و بریندارکرن و گۆت “چەکەکێ باش گەھشتیە دەستێن شەرڤانێن ئێزدی و ھێزێن پێشمەرگەی ل چیایێ شنگاڵ و د ئامادەباشیێ دانە بۆ ھێرشکرنا سەر شنگالێ”.