قایمقامێ شنگالێ مه‌ره‌ما داعش هه‌مبه‌ر شنگال ئاشكه‌را دكه‌ت
ئه‌ڤرۆ نيوز:
قایمقامێ قەزا شنگالێ ئاماژە ب ھێرشا دوھی بۆسەر قەزا شنگالێ و دبێژیت، بۆجارا ئێکێ یە پشتی ھاتنا تیرۆرستێن داعش ھێرشەکا وەسا یا مەزن بھێتەکرن سەر سەنتەرێ قەزا شنگالێ، لدۆر ھەبوونا چەکدارێن پەکەکێ ژی ل دەڤەرێ خویاکر، ھەبوونا چەکدارێن پارتا کرێکارێن کوردستانێ پەکەکێ بوینە ژێدەرێ پەیداکرنا ئاریشەیان ل شنگالێ و پەکەکە نیک شنگالیا یا تۆمەتبارە ب رەڤاندنا زارۆیێن کوردێن ئێزدی.
مەحما خەلیل، قایمقامێ قەزا شنگالێ بۆ رۆژناڤا ئەڤرۆ گۆت” ھێرشا دوھی لسەر شنگالێ ھاتیەکرن ھێرشەکا بەرفرەھبوویە و بۆ جارا ئێکێ یە پشتی ھاتنا داعش و داگیرکرنا شنگالێ ھێرشەکا بڤی شێوەی بھێتەکرن بۆ سەر شنگالێ، داعش دخواست شنگالێ داگیربکەت و بھێنە ناڤا باژێڕی، چونکە ل چەند لایانڤە ھێرشی سەر ھێزێن پێشمەرگەی کربوو، بەلێ ھێرشا ب توندی ھاتە ژناڤبرن و پتریا چەکدارێن پشکدار ھاتنە کوشتن، د ڤێ ھێرشێ دا چەکدارێن داعش نێزیکی 30 تڕۆمبێل و ئامیرێن سەربازی بکارئینابوون، ب راستی پیلانەکا مەترسیدار ھاتبوو دارشتن و نیەتێن خراپ ھەبوون، خۆشبەختانە پێشمەرگەی وەانەیەکا دژوار دایە چەکدارێن داعش و زۆر بشێوەیەکی سەرکەفتیانە ھێرش ھاتە پاشڤەبرن و فڕۆکەیێن ھەڤپەیمانانژی رۆلەکێ مەزن دیت ل بوردۆمانکرنا چەکدارێن داعش و ھەکاریکرنا ھێزێن پێشمەرگەی، سۆزێ دەینە خەلکێ کوردستانێ و شنگالێ ب چو شێوەیەکی نەھێلین داعش جارەکادی شنگالێ داگیر بکەت و پیلانێن وان یێن پیس سەربگرن.
لدۆر ھەبوونا چەکدارێن پەکەکێ ل شنگالێ مەحما خەلیل گۆت” دیارە نوکە مە چو کار بڤان چەکدارێن پارتا کرێکارێن کوردستانێ پەکەکێ نەماینە و ئەگەر بەری نوکە وانا ھەڤکاریا مەکربیت سوپاسیا وان دکەین، بەلێ مەیدانا شەڕێ پەکەکێ نوکە شنگال نینە بەلکۆ کوردستانا باکوورە و دشێن ڤەگەڕن بۆ دەڤەرێن خوە رزگاربکەن، ئیدی ھەر ھێرشەکا بۆ پێشڤە بھێتەکرن چەکدارێن پەکەکێ ناھێلین پشکداریێ بکەن و بڕیارە ئەو دەڤەرێن شنگالێ یێن بن کۆنتڕۆلا داعش ماینە نێزیکە دێ ھێنە کۆنتڕۆلکرن، ھیڤیدارین پەکەکە پشکدار نەبیت و نەبیتە ئاستەنگ ھەمبەر رزگاکرنا دەڤەرێن مایی، چونکە نوکە پەکەکە ل شنگالێ یا تۆمەتبارە ب رەڤاندنا زارۆیێن وەلاتیان و مە بەلگە ھەنە لدۆر رەڤاندنا زارۆیێن شنگالێ ژلایێ پەکەکێ ڤە، چەکدارێن پەکەکێ بووینە ژێدەرێ پەیداکرنا ئاریشەیان بۆ قەزا شنگالێ و کوردێن ئێزدی.
