قایمقامێ فەلوجە بۆ ئەڤرۆ: ھاتنا ھێزێن پەیادە یێن ھەڤپەیمانان بۆ شەڕێ داعش ئێک ژ چارەیانە
ئەڤرۆ:
قایمقامێ فەلوجە راگەھاند، ھەرچەندە ھاتنا ھێزێن پەیادە یێن وەلاتێن ھەڤپەیمان بۆ شەڕێ تیرۆرستێن داعش دناڤ عیراقێ دا، دێ وەکو ھێزێن داگیرکەر ھێنە ھژمارتن ژ لایێ وەلاتیێن عیراقێ ڤە و پێدڤیە لەشکرەکێ نیشتمانی بھێتە دروستکرن و پرچەککرن ژ لایێ وەلاتێن ھەڤپەیمان ڤە.
دکتور زبار عەبدولھادی قایمقامێ فەلوجە ل دۆر کارتێکرنا دربێن ئەسمانی یێن ھێزێن ھەڤپەیمانان دژی تیرۆرستێن داعش بۆ ئەڤرۆ گوت”وان دربان کارتێکرن یا ل تیرۆرستێن داعش کری، لێ ب دیتنا من ئەوێن وان دربان د وەشینن د رژد نینن د کارێ خوەدا و کارێ بەردەوام ژی نینە و ب ھاتنا ھێزێن پەیادە بۆ ناڤ عیراقێ بۆ شەڕێ داعش ئێک ژ چارەسەریانە، لێ چەندین ھوشداری ژی بۆ ھەنە، ژ بەر کو دێ ھێنە ھژمارتن وەکو ھێزێن داگیرکەر ب تایبەتی ھێزێن وان وەلاتێن پشکداری د شەرێ ٢٠٠٣ دا کری، لێ ل دووڤ بووچونا من چارەسەریەکا دی یا ھەی کو ھەموو گەلێ عیراقێ ل گەل وێ چارەسەریێ یە، ئەوژی دروستکرنا لەشکرەکێ نیشتمانی و پیشەیی و پرچەککرنا وی ب چەکێن پێشکەڤتی ژلایێ وەلاتێن ھەڤپەیمان ڤە، دیسا ب پرچەککرنا ھێزێن پێشمەرگەی ژی و ئاڤاکرنا باوەریێ و ھەڤکاریێ د ناڤبەرا لەشکرێ عیراقی و پێشمەرگەی دا، دێ عیراق ب سەرکەڤیت و ژ ھەموو جۆرێن تیرۆرێ ژی دێ رزگار بیت”.
ل دۆر پێرابوونێن حەیدەر عەبادی بۆ ئەنجامدانا چاکسازیێ دناڤ لەشکرێ عیراقێ دا وەکو ھەلوەشاندنا نڤیسینگەھا فەرماندێ گشتیێ ھێزێن چەکدار و خانەنشینکرن و لادانا چەندین فەرماندێن لەشکری و ئاشکراکرنا ھەبوونا ٥٠ ھزار سەربازێن بندیوار، دبێژیت” عەبادی کەسایەتیەکێ تەکنوکراتە و کورێ بەغدایە و حەز و رژدی بۆ گوھۆرینێ بەر ب باشتر ل دەف وی یا ھەی، لێ پرسیار ئەوە، ئایا دێ شێت ڤێ چەندێ ئەنجام دەت؟. فشارێن دەرڤە و ناڤخوەیی و مایتێکرنا ب ھێز یا ئیرانێ د کاروبارێن ناڤخوەیی یێن عیراقێ دا بۆ گرەنتیکرنا بەرژەوەندیێن خوە کارتێکرنا نەرێنی ل سەر پرۆسا سیاسی یا ھەی ب تایبەتی ئیران یاریا تایفگەریێ ب زیرەکانە ب رێڤەدبەت و مخابن ھندەک یێن ھەین ل گەل ڤێ یاریێ دچن.
