قستێن شوقان دێ ب نیڤی بن
ئەڤرۆ نیوز:
ئەندامێ فراکسیۆنا پارتی دیموکراتی کوردستان ل پەرلەمانێ کوردستانێ بۆ ئەڤرۆ دیار کر کو چەندین پێشنیار بۆ ئێکەتیا وەبەرئینەران ب مەرەما ب نیڤیکرنا قستێن شقێن وەلاتیان ھاتینە بلندکرن، لێ ب مەرجەکی زیان نەگەھنە وەلاتیان و خودانێ پرۆژەی و دبێژیت: نوکە ئەم یێ کار ل سەر دانانا سیستەمەکی دکەین، بۆ ھندێ چو ئاریشە د ناڤبەرا وەلاتیان و بالندەری دا دروست نەبن.
فەرسەت سۆفی، ئەندامێ فراکسیۆنا پارتی دیموکراتی کوردستان ل پەرلەمانێ کوردستانێ ئاشکرا کر، ئەو وەکو پەرلەمنتار نەشێن چو گڤاشتنان ل سەر خودانێن پرۆژێن ئاکنجیبوونێ بکەن کو قستێن شقان کێم بکەن، چونکو ب شێوێ گریبەست یێن ھاتینە کرین و فرۆتن د ناڤبەر وەلاتیان و خودان پرۆژان دا و گۆت: “ئەم یێ کار د گەل ئێکەتیا وەبەرئینەرێن کوردستانێ دکەین کو ھێشتا قستێن شقان بھێنە کێمکرن، لێ ھەتا نوکە چو بڕیارێن دووماھیێ ل سەر دەرنەکەفتینە، ھەروەسا ئێکەتیا وەبەرئینەران ژی پێشنیارێن باش بۆ خودانێن پرۆژان ھەنە کو زیان نەگەھنە وەلاتیان و بێ ئاریشە بشێن قستێن خوە بدەن، ب رەما ل بەرچاڤ گرتنا رەوشا ئابووری یا وەلاتیان رەنگە کۆمبوونەک د گەل خودانێن پرۆژان بھێتە کرن”.
پەرلەمانتارێ ناڤھاتی ئاماژە ب وێ چەندێ ژی کر، پێشنیا ھاتیە کرن قستێن شقان بھێنە ب نیڤیکرن و نیڤ بھێتە دان و پشکا دی بمینیت ھەتا قەیران ب دووماھی دھێت و گۆت: “بۆ ڤێ یەکێ ژی دڤێت رێککەڤتنەکا نوو دناڤبەرا خودانێن پرۆژان و وەلاتیان دا بھێتە کرن، ژ بەر کو ھەکەر پێداچوون د ڤی بابەتی دا نەھێتەکرن، گەلەک ئاریشە دێ د ناڤبەرا وەلاتیان و خودانێن پرۆژان دا دروست بن، لەو نوکە ئەم یێ کار دکەین سیستەمەکێ نوو بۆ دانا قستێن شقان بدانین”.
