قه‌ده‌غه‌يا هاتنوچوونێ ل ئامه‌د هاته راگه‌هاندن
ئه‌ڤرۆ نيوز:
واليێ ئامه‌دێ قه‌ده‌غه‌يا هاتنوچوونێ ل هه‌شت ده‌ڤه‌رێن قه‌زا ليجه و هانى و كوجاكوى يێن سه‌ر ب پارێزگه‌ها ئامه‌د راگه‌هاند ب مه‌ره‌ما ئه‌نجامدانا ئۆپه‌راسيۆنا له‌شكرى ل دژى په‌كه‌كێ ل وان ده‌ڤه‌ران.
ب گۆره‌ى راگه‌هاندنه‌كێ كو مالپه‌رێ فه‌رمى يێ والى ل ئامه‌د به‌لاڤكريه، ئه‌و ده‌ڤه‌رێن سۆپايێ توركيا قه‌ده‌غه‌يا هاتنوچوونێ ب مه‌ره‌ما ئۆپه‌راسيۆنا له‌شكرى راگه‌هاندى پێكهاتينه ژ “گۆندێن گۆچلۆ و گۆمه‌چ” سه‌ر ب ده‌ڤه‌را ليجه و “گۆندێ كيريم و گۆگچه و يايڤان و سويلۆ” سه‌ر ب ده‌ڤه‌ر هانى و “گۆندێن يازيكو و شاكلات” سه‌ر ب ده‌ڤه‌را كۆجاكوى.
هه‌ر ب گۆره‌ى وێ راگه‌هاندنێ قه‌ده‌غه‌يا هاتنوچوونێ ل ده‌مژمێر 5:00ى سپێده‌هيا ئه‌ڤرۆ رۆژا ئێكشه‌مبى ده‌سپێكريه و هه‌تا بڕياره‌كا دى دێ يا به‌رده‌وام بيت و مه‌ره‌م پێ ئۆپه‌راسيۆنا له‌شكرى يه ل دژى باره‌گا و ئه‌ندامێن په‌كه‌كێ.