قووناغا دويێ يا سزايێن سه‌ر ئيرانێ كه‌فته وارێ بجهئينانێ
ئه‌ڤرۆ نيوز:
قووناغا دويێ يا سزايێن ئه‌مريكا بۆ سه‌ر ئيرانێ ئه‌ڤرۆ رۆژا دوشه‌مبى كه‌فته وارێ بجهئينانێ. رۆژناما واشنتۆن پۆست ژى دده‌ته زانين كو سزا وه‌سان د دژوار نينن وه‌كو ژێ دهێته گۆتن.
قووناغا دويێ يا سزايێن ئه‌مريكا ب سه‌ر ئيرانێ دا، سپێده‌هيا ئه‌ڤرۆ رۆژا دوشه‌مبى ل ده‌مژمێر 08:00 كه‌فته وارێ بجهئينانێ پشتى ڤه‌كێشانا ئێكلايانه يا تره‌مپ، سه‌رۆك ئه‌مريكا ژ رێكه‌فتنا ئه‌تۆمى يا ل گه‌ل ئيرانێ ئه‌وا ل سالا 2015ێ هاتيه ئه‌نجام دان.
پشتى تره‌مپ بڕيارا ڤه‌كێشانێ ژ وێ رێكه‌فتنێ دايى، وه‌زاره‌تا گه‌نجينا ئه‌مريكا راگه‌هاند كو دێ ب دو قووناغان 90 بۆ 180 رۆژ سزايان ب سه‌ر ئيرانێ دا سه‌پينن.
د ڤى چارچۆڤه‌يى دا پشتى 90 رۆژان ژ قووناغا ئێكێ سزا ل 7ى ته‌باخا ئه‌ڤ ساله دا ل سه‌ر ئيرانێ سه‌پاندن، پشتى ب دووماهى هاتنا وى ماوه‌يى وه‌زاره‌تا گه‌نجينا ئه‌مريكا دياركربوو كو بۆ 180 رۆژايه.
ماددێ دويێ يێ سزايێن وه‌زاره‌تا گه‌نجينا ئه‌مريكا كاروبارێن گرێدايى په‌ترۆلێ ب خوه ڤه دگريت وه‌كو كۆمپانيا په‌ترۆلا نشتيمانى يا ئيرانى (NIOC) و كۆمپانيا تانكه‌رێ نشتيمانى(NITC). ديسا سنورداركرنا نێڤده‌وله‌تى سه‌پينيت ل سه‌ر كرينا په‌ترۆلێ، به‌رهه‌مێن په‌ترۆلێ يان به‌رهه‌مێن پترۆكيمياوى يێن ئيرانێ.
مايك پۆمپيۆ، وه‌زيرێ ژ ده‌رڤه يێ ئه‌مريكا راگه‌هاند كو ئه‌و سزايێن رۆژا دوشه‌مبى ب سه‌ر ئيرانێ دا دهێنه سه‌پاندن، دژوارترين سزانه د مژوويا ئيرانێ دا كو ب سه‌ردا هاتينه سه‌پاندن.
به‌لێ رۆژناما واشنتۆن پۆست يا ئه‌مريكى د راپۆرته‌كێ ئاماژه ب وێ چه‌ندێ كريه كو سزايێن ئه‌مريكا بۆ سه‌ر ئيرانێ سڤكترن ژ يا دهێته چاڤه‌رێكرن.
ب گۆره‌يى راپۆرته‌كا واشنتۆن پۆست يا ئه‌مريكى هه‌ر جاره‌كا ئه‌مريكا بڤێت سزايه‌كێ دژوار ب سه‌ر وه‌لاته‌كى دا ب سه‌پينيت، پێشوه‌خت ئه‌وى وه‌لاتى ل سزايان ئاگه‌هدار ناكه‌ت، به‌لێ ئه‌وا ل گه‌ل ئيرانێ ب وى ره‌نگى سه‌ره‌ده‌رى نه‌كر.
هه‌ر ديسا ئاماژه ب وێ چه‌ندێ ژى كريه كو به‌رپرسێن ئيدارا تره‌مپ هه‌ر رۆژێ پشكه‌ك ژ سزايێن ئيرانێ ئاشكه‌را دكه‌ن، ئه‌ڤه ژى دبيته ده‌ليڤه بۆ ئيرانێ كو پلانێن هه‌ڤدژ بۆ وان هه‌موو سزايان ب سه‌ر دا هێنه سه‌پاندن هه‌بيت و خوه ژێ رزگار بكه‌ت.
چه‌ند شاره‌زايێن وارێ كاروبارێن ئه‌مريكا ژى ئاماژه ب وێ چه‌ندێ كريه كو كێشا مه‌زن ئه‌وه ئه‌مريكا نه‌شێت ب ساناهى وه‌لاتێن دى گرێدايى ڤان بڕياران بكه‌ت بۆ مامه‌له‌كرنا بازرگانى ل گه‌ل ئيرانێ و مه‌ترسيا وێ چه‌ندێ هه‌يه كو ئه‌مريكا د مه‌يدانێ دا ب تنێ بمينيت.
ب گۆره‌يى راپۆرتێ، توركيا و هندستان كو دو مه‌زنترين كريارێن په‌ترۆلا ئيرانێ نه، هاتينه ئازاكرن ژ سزايێن ئه‌مريكا و چينێ ژى كو مه‌زنترين بازرگانى ل گه‌ل ئيرانێ هه‌يه، يا ئاماده نينه پێگريێ ب سزايان بكه‌ت.
راپۆرتێ ئه‌و چه‌ند ژى روونكريه كو ئيرانێ چه‌ند دژى پلانه‌كێن ئاماده كرين دژى سزايێن ئه‌مريكا و بزاڤێ دكه‌ت په‌ترۆلا خوه د بن ڤه دا تێكه‌لى په‌ترۆلا وه‌لاتێن دى بكه‌ت يان ژى هه‌موو كودێن ئه‌لكترۆنى يێن سه‌ر تانكه‌رێن په‌ترۆلێ بگوهۆڕيت.
