قۆناغەکا نوو د پەیوەندیێن روسیا و ئەمریکا دەستپێ دکەت
ئەڤرۆ:
ل گۆر راپۆرتەکا ئاژانسا بی بی سی فارسی سەرۆکێ ئەمریکا باراک ئۆباما رۆژا ٢٥ ڤێ مەھێ د پەیوەندیەکا تەلەفونی دا ل گەل سەرۆکێ روسیا ڤیلادەمیر پۆتین بەحسێ رەوشا دەڤەرێ ب تایبەتی ژی ئالۆزیێن ل سووریا، عیراق و یەمەنێ کریە و داخواز ژ روسیا کریە کو سیاسەتەکا ھەڤپشک ل دژی ئالۆزیان برێڤە ببەن، چونکو ئالۆزبوونا رەوشا رۆژھەلاتا ناڤین زیانەکا مەزن گەھاندیە بەرژەوەندیێن روسیا و ئەمریکا و ب تایبەتی ژی ژ بۆ شەرێ ل دژی داعشێ و نەھێلانا بەرنامێ ئەتۆمی یێ ئیران دڤێت روسیا رۆلەکێ کاریگەر ب گێریت.
د بەردەوامیا راپۆرتێ دا ھاتیە دیار کرن کو سەرۆکێ روسیا دلخوەشیا خوە ل ھەمبەر ڤێ یەکێ دیار کریە و راگەھاندیە کو روسیا دخوازیت قەیرانا سووریا و یەمەنێ چارە ببیت و ژ بۆ وێ یەکێ ژی دێ ب رۆلێ خوە رابیت و سەبارەت ب ئیرانێ ژی روسیا ناخوازیت کو ئەو وەلاتە ببیتە خوەدا چەکێن ئەتۆمی، چونکو ھەکە ئیران تشتەکێ وەسا بکەت ئەو یەک دێ رۆژھەلاتا ناڤین بەر ب قەیرانەکا مەزن ڤە ببەت و روسیا ژی دژی ھندێ یە کو ئیران ببیتە خوەدان چەکێن ئەتۆمی.
ل ئالیێ دی ئاژانسا رویتەرز یا نووچەیان ژی بەلاڤ کریە کو دەمەکە شاندەکێ پایەبلند یێ ئەمریکا ل روسیایە و ل گەل بەرپرسێن وی وەلاتی دانوستاندنان دکەن، چونکو شیرەتکارێ ئۆبامای بۆ سەرۆکێ ئەمریکا دیار کرینە کو نھا روسیا د بیاڤێ ئابووری و ئالۆزیا ل ئوکرانیا گەلەک تەنگاڤە و ھەکە ئەمریکا ھندەک پێنگاڤان ب ھاڤێژیت پۆتین دێ نەچار بیت گەلەک داخوازیێن ئەمریکا قەبوول بکەت، ب تایبەتی ژی سەبارەت ب قەیرانا سووریێ، چونکو روسیا ئێدی نەشێت پتر باجا قەیرانا سووریێ بدەت و پۆتین ژی دخوازیت کو چارەیەک بۆ قەیرانا وی وەلاتی بھێتە دیتن.
ھەفتیا بۆری ئاژانسەکا ئەلمانیا ژی دیار کربوو کو ئەمریکا و روسیا گەھشتنە رێککەڤتنەکێ کو ل گۆر وێ دێ نەھێلن دیمەشق بکەڤیتە دەستێ گرۆپێن ھشکباوەر و دێ بەرھنگاریا نەرم یا سووریێ بۆ دەستھەلاتێ بھێتە ئامادەکرن و ھەروەسا دێ بەشار و خێزانا وی ژی وەک پەنابەر ل روسیا بھێنە ئاکنجی کرن و ژیانا وان بھێتە پاراستن دا کو وی رەنگ بشێن چارەیەکێ بۆ رەوشا سووریا پەیدا بکەن و روسیا ژی ژ بەر بەرژەوەندیێن خوە یێن ل سووریێ و مەترسیێن ل ئوکرانیا دخوازیت ب ڤی رەنگی بەرەڤانیێ ژ بەرژەوەندیێن خوە بکەت.
