قەتەر دێ شەش پڕۆژەیان ل زاخۆ بجهـ ئینیت
زاخۆ، دلۆڤان هالۆ:
ب مەرەما پێشڤەبرن و بهێزكرنا پەیوەندیێن دو قۆلی، شاندەكێ ئیدارەیا سەربخوە یا زاخۆ ب سەرۆكاتیا گوهدار شێخۆ سەرەدانا قەتەرێ كربوو، ل وێرێ ل گەل ڕێڤەبەرێ كارگێری یێ وەبەرهێنانا قەتەرێ ل ئاسیا و ئەفریقیا كۆمبوو، سەرپەرشتێ ئیدارەیا سەربخوە یا زاخۆ پێشنیارا بجهئینانا 11 پڕۆژەیان بۆ وان كربوو و شەش پڕۆژە ژ لایێ وان ڤە هاتنە پەسەند كرن.
جگەرخوین تاهر، ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ل دووماهیا ڤێ مەهێ شاندەكێ كۆمپانیێن وەلاتێ قەتەرێ دێ سەرەدانا زاخۆ كەن و بڕیارێ ل سەر بجهئینانا شەش پڕۆژەیان دەن.
ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ، ئاماژە ب وێ چەندێ ژی كر كو ژ وان پڕۆژەیان دروستكرنا سكرێ زاخۆ، كو شیانێن عمباركرنا 110 ملیۆن و 215 هزار مەترێن سێجا یێن ئاڤێ هەیە، دیسا پڕۆژەیێ گەلیێ زاخۆ یێ گەشتوگوزاری، كو مەزنترین پڕۆژەیێ گەشتوگوزارییە ل سەر ئاستێ هەرێما كوردستانێ، ڕووبەرێ پڕۆژەیی 54 ملیۆن و 790 هزار مەترێن دوجانە.
جگەرخوینی زێدەتر گۆت: «پڕۆژەیێ دانانا بازاڕێ جیهانی، كو نموونەیەكا گەشتوگوزاری یا ب ناڤودەنگە و ل سەر ڕووبەرێ 250 هزار مەترێن دوجا دێ هێتە بجهئینان، دیسا پڕۆژەیێ شەمەندەفڕا هەلاویستی، كو پڕۆژەیەكێ گەشتوگوزارییە ل سەر ڕووبارێ خابووری ب درێژاهیا شەش كیلۆمەتران دێ هێتە دروستكرن، دیسا پڕۆژەیێ وەستگەها بەرهەمهئینانا وزەیا كەهرەبێ ژ ئاڤێ ل سەر ڕووبارێ خابووری، دیسا پڕۆژەیێ بازاڕێ بەفرێ، كو هۆلەكا مەزن یا حلیسانكا ل سەر بەفرێ یە و دێ كەڤیتە پشكا باشوورێ باژێڕی».
