كادر و بەرپرسێن ئێكەتیێ بەردەوام پەیوەندیێ ب ڕێزێن پارتی دكەن
هەوا هەلبژارتنان ل كەركووكێ یا بەردەوامە، بەرپرسەكێ پارتی ژی ل كەركووكێ دبێژیت كادر و بەرپرسێن ئێكەتیێ بەردەوام دهێنە د ناڤ ڕێزێن پارتی دا، هەروەسا دیاركر ژی كو پشتی ئەنجامدانا هەلبژارتنێن جڤاتێ پارێزگەهان دێ پارێزگەرەكێ كورد ل پۆستێ پارێزگەرێ كەركووكێ بیت، خەلكێ كورد ژی ب ئومێد ڤە دنێرنە پارتی و زڤرینا وێ بۆ کەرکووکێ.
لوقمان كاكەیی، كارگێرێ لقێ سێ یێ پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی پشتی ڕوودانێن 16 ئۆكتۆبەرێ كارێ خوە یێ حزبی ل كەركووكێ هەلاویست و دانپێدان ب حوكمڕانیا سەپاندی و داگیركاریا باژێری نەدكر، پشتی ڕێككەفتنێ ل گەل هەڤپەیمانیا بڕێڤەبرنا دەولەتێ بۆ پێكئینانا حوكمەتا ئیراقی وی دەمی بڕیار هاتە دان پارتی ل كەركووكێ دەست ب كارێ خوە یێ سیاسی بكەت و بارەگەهێن خوە یێن داگیركری وەرگرتن، كار ژی دكەت بۆ ب دوماهی ئینان ب وێ حوكمڕانیا ل وی باژێرێ هەی».
كاكەیی دیاركر» مە وەكو پارتی دیموكراتی كوردستان بەری دەمەكێ كێم بارەگەهێن خوە وەرگرتینە و هەوا هەلبژارتنان بۆ هەلبژارتنێن جڤاتا پارێزگەها كەركووكێ دەستپێكریە، ل ئەوان هەردو كۆمبوونێن بەرفرەهێن جەماوەری یێن مە ئەنجامداین تێدا مە بەربژارێن پارتی دانە نیاسین، خەلكەكێ مەزن پشكداری د كۆمبوونا جەماوەری دا كر و دلێ خەلكی ژی یێ خوەشە ب زڤرینا پارتی بۆ كەركووكێ».
هەوەرسا گوت» مە تیم یێن پێكئیناین كو سەرەدانا وەلاتیان ل مالان و ل بازاران دكەن و بانگەشێ بۆ لیستەیا 197 و بەربژارێن پارتی دكەن و وەلاتی گەلەك ب باشی پێشوازیێ لێ دكەن، خەلكێ كەركووكێ ب كۆم ژی ڕوو ل بارەگەهێن پارتی دكەن، وەلاتیێن كەركووكێ باش دزانن ئەو مافێ ئەوان ل باژێری هەی و ژێ هاتیە وەرگرتن ژ زەڤیێن ئەردی و ئیدارەیێ و پشتگوه هاڤێتنا كوردان، خەلكێ بیانی ئینایە پێش پشتی 16 ئۆكتۆبەرا 2017، دێ دووماهی پێ هێت». وی كارگێرێ لقێ سێ یێ پارتی ل كەركووكێ خویاكر ژی» هەموو بزاڤێن مە ئەون كوردستانی ل ڕۆژا 18 ڤێ مەهێ بچنە سەر سندۆقێن دەنگدانێ و دەنگێن كوردان زێدە ببن و پۆستێ پارێزگەرێ كەركووكێ وەربگرین و كوردەكێ كوردپەروەر د وی پۆستی دا بهێتە دانان، ئەوژی ئومێدەكە ل دەف وەلاتیێن كەركووكێ ب گشتی».
پتر گوت» ب دیتنا مە نابیت د هەوا هەلبژارتنان دا دەمێ كادرەكێ حزبی سەنگەری بۆ ناڤ حزبەكا دی ڤەدگوهێزیت، د ڕاگەهاندنێ دا بهێتە مەزنكرن، بەلێ ئێكەتی دەستپێشخەر بوو لەوما مە ژی دەستپێكر و ڕۆژانە خەلكێ بەرپرس و كادر و ئەندامێن ئێكەتیێ پەیوەندی ب پارتی دكر و مە ل ڕاگەهاندنێ باس نەدكر، ل ڕۆژێن بهێن ژی دا خەلكێ ئێكەتی سەنگەرێ خەباتا خوە دێ بۆ ناڤ پارتی ڤەگوهێزن».
ل دوماهیێ گوت» پشتی 16 ئۆكتۆبەرێ پارێزگەرێ سەپاندی ل سەر كەركووكێ ب پشتەڤانیا بەغدا، تنێ بۆ ئەرەبا كار دكەت و دناڤ ئەرەبا ژی دا بۆ عەشیرەتا خوە كاردكر، وەكو پارێزگەرێ كەركووكێ ڕەفتار نەكریە، كەركووكێ ئیراقەكا بچووكریە هەر كەسێ ل سەر كورسیێ پارێزگەری بیت، پێدڤیە ب دادپەروەرانە ڕەفتارێ ل گەل كورد و ئەرەب و توركمانان بكەت، دخوازین دڤان هەلبژارتنان دا كورسیێن پێدڤی بدەستڤەبینین و ل گەل ئالیێن دی یێن كوردستانی، كوردەكێ باش ل سەر كورسیا پارێزگەری دابنین».
