كارتێن بايۆمه‌ترى يا ئه‌ندامێن داعشێ دێ چ لێ هێن؟
ئه‌ڤرۆنيوز:
ئه‌ندامه‌كێ كۆمسيۆنا بلند يا هه‌لبژارتنان ل عيراقێ ئاشكرا دكه‌ت، چو ناڤێن دياركرى يێن ئه‌ندامێن داعشێ ل ده‌ف وان نين تاكو كارتێن بايۆمه‌ترى يێن ده‌نگدانێ نه‌ده‌نێ.
مالپه‌رێ سپۆتنيك يێ رووسى راپۆرته‌كا كورت ل سه‌ر كارتا بايۆمه‌تريا وان كه‌سان دروستكريه ئه‌وێن ب سه‌ر داعشێ ڤه بوون ونوكه ژلايێ دادگه‌هێ ڤه دداخوازكرى نه.
حازم ردينى، ئه‌ندامێ كۆمسيۆنا بلند يا هه‌لبژارتنان ل عيراقێ، ئه‌ڤرۆ چارشه‌مبى 2/5/2018 ب مالپه‌رێ ناڤبرى گۆت” كۆمسيۆنێ چو ناڤ ل ده‌ف نينن تاكو بزانين چ كه‌سه‌ك ئه‌ندامێ داعشێ بوو تا ژ مافێ ده‌نگدانێ دوور بێخيت”.
ده‌مێ رێكخراوا تيرۆرستى يا داعشێ ل چه‌ند ده‌ڤه‌رێن عيراقێ ده‌ستهه‌لاتا خوه سه‌پاندى، گه‌له‌ك وه‌لاتيێن عيراقى لايه‌نگرێن وێ رێكخراوێ بوون، نوكه ژى پتريا وان ژلايێ دادگه‌هێ ڤه دداخوازكرى نه.
ل دۆر وێ چه‌ندێ ئايا ئه‌و تيرۆرسته دشێن پشكداريێ دهه‌لبژارتنان دا بكه‌ن، وى ئه‌ندامێ كۆمسيۆنێ سه‌ره‌راى دووپاتكرنا وى كو ليستێن ب وان جۆرێن ناڤان ل ده‌ف وان نينه گۆت” چه‌كدارێن داعشێ نه‌شێن پشكداريێ دهه‌لبژارتنان دا بكه‌ن، له‌وما كارتێن ده‌نگدانێ ژى وه‌رناگرن”.
سه‌ربه‌ست مسته‌فا سه‌رۆكێ به‌رێ يێ كۆمسیۆنا بلند يا هه‌ڵبژاردنان ل عيراقێ دبێژيت “ئه‌و ده‌ڤه‌رين پێشتر دبن ده‌ستهه‌لاتا داعشێ دابوون، مه كار لێ نه‌كريه”.
گۆت ژى” ده‌زگه‌هێن ئه‌منى دشێن ناڤێن وان تيرۆرستان بده‌نه ده‌زگه‌هێن ئه‌منى بۆ وێ چه‌ندێ ب پرۆگرامه‌كێ تايبه‌ت كارتێن ده‌نگدانێ يێن وان جۆره كه‌سان بهێنه هه‌لوه‌شاندن”.
گه‌له‌ك ژ وه‌لاتيێن عيراقێ نيگه‌رانيا خوه دياردكه‌ن كو هنده‌ك لايه‌نێن سياسى يێن عيراقى ب شێوازه‌كێ تايبه‌ت كارتێن ده‌نگدانێ يێن ئه‌ندامێن داعشێ دبه‌ن وبۆ مه‌ره‌مێن خوه بكاردئينن.
