كاره‌با نیشتیمانى دێ کێم بیت
ئەڤرۆ نیوز ، تۆڤی:
ب ئەگەرێ كێمبوونا غازێ و چه‌ند گرفتێن ته‌كنیكى، چەند ئێکەیێن كاره‌بێ ل هه‌ولێر و سلێمانیێ ژ كاركه‌فتینە و رێڤه‌به‌رێ كۆنتڕۆلا كاره‌با هه‌رێمێ دبێژیت، ب ئەگەرێ وان گرفتان دێ كاره‌با نیشتیمانى کێم بیت.
ب ئەگەرێ کێمبوونا غازێ ل وێستگه‌هێ دابنیكرنا كاره‌با كۆرمۆر، چه‌ند یه‌كه‌یێن كاره‌بێ ل هه‌ولێر و سلێمانیێ هاتینە راوەستاندن، ئه‌ڤەژی بوویە ئەگەرێ هندێ کو كێمترین كاره‌با نیشتیمانى بگەهیتە وەلاتیان و هەتا نوکە یا دیارنینه دێ کەنگی ئەڤ كێشه هێتە چاره‌سه‌رکرن.
ئومێد محه‌مه‌د رێڤه‌به‌رى كۆنترولا كاره‌بێ ل وه‌زاره‌تا كاره‌با هه‌رێمێ گۆتیە، په‌ستانا غازێ ل وێستگه‌هێ سه‌ره‌كى یێ كۆرمۆر كێمكریە و هندەک گرفتێن ته‌كنیكى بۆ كۆمپانیا دانه غاز دروستبووینه.
گۆتیە ژی مە پلانەکا باش بۆ زێدەكرنا كاره‌با نیشتیمانى بۆ رۆژانێن جه‌ژنێ دانابوو، به‌لێ ئه‌ڤ كێمبوونه کو نێزیكى 500 مێگاواتانە، دێ كاره‌با نیشتیمانى کێم کەت، لێ ئەم ل گەل كۆمپانیا دانه غاز ل سه‌ر خه‌تێینە و ئەم چاڤەرێنە دنێزیکترین دەمدا ڤێ كێشێ چاره‌سه‌ر بکەین و دۆخێ كاره‌بێ ڤەگەرینینە دۆخێ خوە یێ ئاسایی.
د نوکە دا هه‌رێما كوردستانێ شیانێن 2500 هەتا 2600 مێگاواتێن كاره‌بێ هه‌نە و رۆژانه نێزیکی 12 دەمژمێران كاره‌با نیشتیمانى ددەنە وەلاتیان.
