كریا فروشگه‌هێن قوتابخانان هاته زێده‌كرن
ئه‌ڤرۆ نیوز، نه‌وزاد هلۆرى:
وه‌زاره‌تا په‌روه‌ردێ یا حوكمه‌تا هه‌رێما كوردستانێ د نووترین بریاردا راگه‌هاندیه كو كریا فروشگه‌هێن ناڤا قوتابخانان ب رێژا 15%ێ هاتیه زێده‌كرن و ئه‌ڤ یه‌ك ژى بوویه ئه‌گه‌ر كو پشكه‌ك ژ وان خودان فرۆشگه‌هان دلگران ببن.
ب گۆره‌ى نڤیساره‌كا رێڤه‌به‌ريا په‌روه‌ردا پارێزگه‌ها دهۆكێ / رۆژئاڤا كو ئاراسته‌ی هه‌موو قوتابخانان هاتیه كرن دیار دبیت كو ب گۆره‌ى نڤیسارا رێڤه‌به‌ریا گشتى یا په‌روه‌ردا پارێزگه‌ها دهۆك یا هژمار (13045) و ب مه‌ره‌ما رێنمايكرنا كرێكرنا فرۆشگه‌هێن ناڤا قوتابخانان د شیاندایه فرۆشیارێن سالا بۆرى یا فرۆشگه‌هێن قوتابخانان هه‌مان فرۆشگه‌هێ وه‌ربگرن ب مه‌رجێ رێڤه‌به‌ریا قوتابخانێ په‌سه‌نده‌كێ بده‌تێ و گۆژمێ گرێبه‌ستێ ژى ب رێژا 15% بهێته بلندكرن.
حكمه‌ت ئه‌حمه‌د، ئێكه ژ خودان فروشگه‌هێن ناڤا قوتابخانان بۆ ئه‌ڤرۆ نیوز گۆت: (من نێزیكێ 10 قوتابخانان ل سه‌نته‌رێ باژێرێ دهۆكێ و ده‌وروبه‌ران ب كرێ گرتینه و چه‌ند ساله ڤه‌دكه‌م، و هه‌ر چه‌ند پێشتر ژى وه‌كو پێدڤى ئه‌م دمفادار نه‌بووين، چونكى كریا گرانه و بازارێ لاوازه ، به‌لێ ئه‌ڤ بریارا نوكه هاتى بارێ مه زوۆر گرانكر و دێ بیته ئه‌گه‌ر كو ب رێژا 75% ئه‌م كارێ خوه بهێلین و به‌رده‌وامیێ نه‌ده‌ینێ).
زێده‌تر گۆت: (ئه‌ڤ بریاره بریاره‌كا ناڤخوه‌يى یا پارێزگه‌ها دهۆكێ يه و باوه‌رناكه‌م ل چو پارێزگه‌هێن دى بهێته بجهكرن، به‌لێ ل پارێزگه‌ها دهۆكێ هاتیه بجهكرن و قوتابخانه دڤێت پێگیربن، و پێدڤیه رێڤه‌به‌ریا په‌روه‌رده‌ێ پێداچۆنێ تێدا بكه‌ت).
