كـلارا عـودیـشۆ: پـترییا كـریـستییانـێن ئـیراقێ چـووینـە ژ دەرڤـە
هەولێر، قائید میرۆ
نوونەرەكا كریستییانان ل خۆلا بۆری یا پەرلەمانێ كوردستانێ ئاشكراكر، هەرێما كوردستانێ بوویە جهێ حەواندنا كریستیانان و دبێژیت، ب گۆڕەی ئامارێن كەنیسێ بەری پرۆسەیا ئازادیا ئیراقێ ملیۆنەك و 500 هزار كریستییان ل ئیراقێ هەبوون، بەلێ پترییا وان ژبەر مەترسیێن تیرۆرێ و شەڕێ مەزهەبی چووینە دەرڤە.
كلارا عودیشو، نوونەرا كریستییان ل خۆلا بۆری یا پەرلەمانێ كوردستانێ بۆ رۆژنامەیا (ئەڤرۆ) گۆت» رێڤەچوونا رۆزا نزایا نیشتیمانی ل هەرێما كوردستانێ كو بەری دەمەكی ب دەستپێشخەرییا سەرۆك بارزانی هاتیە ئەنجامدان، پێنگاڤەكا گرنگ بوو، چونكە بێی پێداچوون ئەو رۆژە ل كوردستانێ نەهاتیە ئەنجامدان و ئەو دزانن هەرێما كوردستانێ جهێ پێكڤەژیانێ و ژێدەرێ ئاشتیێیە بۆ دەڤەرێ، هەروەسا سەرۆك بارزانی ژێدەرێ دانوستاندن و ئاشتیێیە ل گەل هەركەسەكێ دی، هەروەسا نێزیككرنا كەسێن بۆچوونێن جودا هەین، كریستییان ژی د وێ رۆژێدا پشكداربوون و كریستییانان بەردەوام كاركریە بۆ زێدەتر بەلاڤكرنا گیانێ پێكڤەژیانێ و لێبۆرینێ».
كلارا عودیشۆ گۆت ژی» ژبەر نە ئارامییا ئیراقێ كریستییانێن دەڤەرێن دی یێن ئیراقێ نەچاربووینە دەركەڤن و بچنە وەلاتێن دەرڤە، بەرۆڤاژی ل هەرێما كوردستانێ كریستییانان پێشكەفتن بخوەڤە دیتییە و ژیانا وان یا پاراستییە».
ئاماژەكر» بەری حەفت هزار سالان كریستییان ل ئیراقێ ژیاینە و دیرۆكا كریستییانان یا دیارە، بەلێ مخابن ل بەغدایێ و باژێڕێن دی یێن ئیراقێ كریستییان نەماینە، د دەمەكیدا بەری نوكە هەژمارەكا بەرچاڤ یا كریستییانان ل ئیراقێ هەبوون، تنێ ل هەرێما كوردستانێ كریستییان ماینە وەك خوە، ب سەدەمێ سیاسەتا حوكمەتێن بەرێ یێن ئیراقێ بەردەوام كریستییان هاتینە نەچاركرن ژ ئیراقێ دەركەڤن، ل سەردەمێ رژێما بەعس چەندین كۆمكوژی دژی كریستییانان هەبووینە، مینا مللەتێ كورد ستەم ل كریستییانان ژی هاتیەكرن ل ئیراقێ، د دووڤدا شەڕێ تائیفی پەیدابوو كریستییان وەك پێكهاتەكێ بچووك ژ بەغدا و هندەك دەڤەرێن ئیراقێ رەڤین و پاشی گرۆپا تیرۆرستییا داعشێ پەیدابوو ورەوشا كریستییانان ب ئێكجاری كەفتە د مەترسیێدا».
رۆهنكر ژی» مە چو ئامارێن فەرمی ل دۆر مشەختبوونا كریستییانان نینن، بەلێ ب گۆڕەی ئامارێن كەنیسێ داینەمە دیار دكەن بەری نوكە ملیۆنەك و 500 هزار كرستییان ل ئیراقێ هەبوون، بەلێ پشتی كاودانێن ئیراق تێدا دەربازبووی مخابن نوكە ل سەرانسەری ئیراقێ 200 هزار كریستییان یێن ماین، ب تایبەتی ل بەغدایا پایتەختێ ئیراقێ كریستییان هاتینە نەچاركرن ب دەركەڤن».
