كـۆمپانیەك بەرهەمێ تریـێ جۆتیارێن پارێزگەها دهۆكێ وەردگریت
دهۆك، لەزگین جۆقی:
رێڤەبەرێ گشتی یێ چاندنێ ل پارێزگەها دهۆكێ دیاركر كو ئێك ژ بەرنامەیێن حوكمەتا هەرێما كوردستانێ ئەوە، ب هەماهەنگی ل گەل كەرتێ تایبەت بازاڕی بۆ بەرهەمێ خۆمالی پەیدا بكەت، ئەڤە ژی بوویە ئەگەر كارئاسانی بۆ بازرگانان بهێنە كرن، كو پڕۆژەیێن وەبەرهێنانێ دورست بكەن و ب رێیا ڤان پڕۆژەیان بازاڕی بۆ بەرهەمێ ناڤخۆ پەیدا بكەن، كۆمپانیا كاڤین گرین هاوس ژی ئێك ژ وان كۆمپانیانە بەردەوام پشتەڤانیا جۆتیاران و بەرهەمێ ناڤخۆ دكەت، د نوكە ژی دا ب هەماهەنگی ل گەل رێڤەبەریا گشتی یا چاندنێ دەست ب وەرگرتنا تریێ جۆتیاران كریە و د دو رۆژێن بۆری دا پتر ژ 20 تەنێن تری وەرگرتینە و پرۆسێسا وەرگرتنێ یا بەردەوامە.
ئەحمەد جەمیل، رێڤەبەرێ گشتی یێ چاندنێ ل دهۆكێ بۆ ئەڤرۆ گۆت: «سالا بۆری ژی كۆمپانیا ناڤبری 500 تەنێن تریێ جۆتیاران وەرگرتبوون و بەردەوام هاریكار و پشتەڤانە بۆ پەیداكرنا بازاڕی بۆ بەرهەمێ ناڤخۆ، سالانە ژی ئەڤ كۆمپانیە سپۆنسەریا فێستیڤالا تری و هنگڤی دكەت، وەكو پشتەڤانی بۆ بەرهەمێ ناڤخۆ».
