كێمترين نمره چه‌ند دێ ل زانكۆيێن ئه‌هلى هێته وه‌رگرتن؟
ئه‌ڤرۆ نيوز:
ل گۆرەی دووماھی بریارا وەزارەتا خواندنا بلند، ل دەمێ وەرگرتنا قوتابیێن ئەڤ سالە ل زانکۆ و پەیمانگەھان، نابیت ئەو قوتابیێن کۆنمرێ وان ژ ٥٥ کێمتر بیت ل چو زانکۆیا بھێنە وەرگرتن و خوە ل زانکۆ و پەیمانگەھێن ئەھلی ژی ناھێنە وەرگرتن. جێگرێ سەرۆکێ زانکۆیا پۆلیتەکنیک ل دھۆکێ راگەھاند، ئەڤ چەندە نابیتە غەدر ل قوتابیان، بەلکو بۆ بلندکرنا ئاستێ وان یێ زانستیە. رێڤەبەرێ تۆمارا گشتی ل زانکۆیا دھۆک دیار کر، مە شیانێن وەرگرتنا سێ ھزار ھەتا سێ ھزار و ٤٠٠ قوتابیان ھەنە و زێدەتر مە شیانێن وەرگرتنێ نینن.
د. سەعید خۆدێدا عەلو، رێڤەبەرێ تۆمارا گشتی ل زانکۆیا دھۆک بۆ ئەڤرۆ دیار کر، زانکۆیا دھۆکێ ژ (٥٨) بەشێن زانستی پێکدھێت و ئەڤ بەشێن زانستی سالانە ل دووڤ شیانێن خوە قوتابیان وەردگرن و ھەر بەشەکی چەند کورسیک ھەنە دێ ھند قوتابیان وەرگریت، شیانێن مە بۆ ئەڤ سالە سێ ھزار ھەتا سێ ھزار و ٤٠٠ قوتابیان ھەنە و زێدەتر مە شیانێن وەرگرتنێ نینن.
ل دووڤ مەرجێن ئەڤ سالە ل وەزارەتا خواندنا بلند دەرکەفتین نابیت قوتابی ل زانکۆیێن تایبەت بھێنە وەرگرتن و کونمرێن وان ژ ٥٥% کێمتر بن و ھندەک بەشێن زانکۆیێن تایبەت کونمرێن ٥٥% بلنتر دھێنە وەرگرتن، بۆ نموونە بەشێن قانوونی دڤێت نمرێن وان ژ ٦٥ کێمتر نەبیت.
د. کاروان عزەت، جێگرێ سەرۆکێ زانکۆیا نەورۆز گۆت: وەزارەتا خواندنا بلند بۆ ئەڤ سالە رێنماییێن نوو دەرکرینە و ل دووڤ وان رێنمایان کونمرێن وەرگرتنا قوتابیان ل زانکۆ و پەیمانگەھێن تایبەت ھاتیە بلندکرن ب رێژا پێنچ نمران ل سەر کونمرێ قوتابیان، ئەڤ چەندە دێ بیتە ئەگەرێ دروستکرنا گەلەک ئاریشان بۆ زانکۆیێن تایبەت.
زێدەتر دبێژیت: ھژمارا دەرچوویێن ئەڤ سالە یێن رێزا دوازدێ یا زۆرە، گەلەک ژ وان قوتابیان ل زانکۆیێن حکومی ناھێنە وەرگرتن، پێشبینی دھێتەکرن ئەڤ سالە نێزیکی ١٥ بۆ ٢٠ ھزار قوتابیان ل زانکۆ و پەیمانگەھێن حکومی ناھێنە وەرگرتن، رێیا دویێ بۆ ڤان قوتابیان زانکۆیێن تایبەتن، بەلێ مخابن ئەڤ سالە وەزارەتا خواندنا بلند بریارەک یا دەرکری ل دووڤ ڤێ بریارێ کونمرێ (٥٠%) ھەتا (٥٥%) نە ل زانکۆیان و نە ل پەیمانگەھێن تایبەت ژی ناھێنە وەرگرتن، وەزارەتێ دڤێت کۆنمرێ (٥٥%) و کێمتر پێشکێشی پەیمانگەھێن تایبەت بکەن.
ھەروەسان گۆت: ل دووڤ رێنمایێن وەزارەتێ، زانکۆیا نەورۆز شیانێن وەرگرتنا ھزار و ٢١٠ قوتابیان ھەنە، بەلێ زانکۆیا نەۆرۆز شیان ھەنە رێژەکا زۆرتر وەربگریت، لێ وەزارەت یا رێنمایان دانیت و ئێک ژ وان رێنمایان پلانا وەرگرتنێ یە و پلانا ھژمارا قوتابیێن وەرگرتی قوتابیان دیاردکەت، ئەڤ رێنمایە ھاتینە دەرکرن بێی وەزارەتا خواندنا بلند ئاگەھداریا زانکۆیێن تایبەت بکەت ل سەر ڤان رێنمایان یا پێدڤی بوو وەزارەت ل گەل ھەموو زانکۆیێن تایبەت کۆمببا و بۆچونێن وان وەرگرتبان و پاش بریارا خوە دەرکربا.
د. سەعید ئسماعیل سەرۆکێ کەمپا زانکۆیا جیھان ل دھۆکێ گۆت: پلانا وەرگرتنا قوتابیان ل زانکۆیا جیھان یا گرێدایە ب رێنمایێن وەزارەتا خواندنا بلند، ل دووڤ ڤێ پلانێ ئەڤ سالە مە شیانێن وەرگرتنا دو ھزار قوتابیان ھەنە، ئەڤ پلانا یا پابەندە ب رێنمایێن وەزراتێ ڤە، چونکو وان ھندەک پیڤەرێن خوە یێن تایبەت ھەنە بۆ وەرگرتنا قوتابیان، گەلەک پیڤەر دباشن بۆ بەرزکرنا ئاستێ زانستی یێ قوتابیان.
ھەروەسا ناڤبری گۆت: دەربارەی نمرێن وەرگرتنا قوتابیان ل زانکۆیا جیھان پێدڤیە ئاستەک بھێتە دانان کو نێزیکی زانکۆیێن حکومی بیت، پێدڤیە بەری نمرێن قوتابیان ببیتە پیڤەر بۆ وەرگرتنا وی ل زانکویێن حکومی و تایبەت قوتابی بھێتە ئاگەھدارکرن، بۆ نموونە قوتابی بھێتە ئاگەھدارکرن بۆ سالا ٢٠١٦_٢٠١٧ ئەگەر نمرێن وی ژ ٥٥_٦٠ کێمتربیت ناھێتە وەرگرتن، نەل زانکویێن حکومی و نە ل زانکۆیێن تایبەت، ئەڤە چەندە دێ بیتە ھاندەرەک بۆ بەرزکرنا ئاستێ قوتابی.
ل دووڤ بارودوخێ کوردستانێ یا پێدڤی بوو ئەو بریار ھاتبا پاشئێخستن کو قوتابیێ نمرێن وی ژ ٥٥% کێمتربیت ناھێتە وەرگرتن ئەڤە ژ لایەکیڤە، یان ژی وەزارەتا خواندنا بلند سەرۆک زانکۆیێن حکومی و تایبەت گازی کربان بۆ کومبونەکێ و بۆچوونا وان وەرگرتبایە، ئەگەر پلانا وان بلندکرنا ئاستێ زانستی با، ئەم داخواز ژ وەزارەتێ دکەین پێداچوونەکێ د بریارا خوە دا بکەن، ژ بەرکو ئەڤ سالە کوردستان یا د باردۆخەکێ تایبەت دا دەربازدبیت و پێدڤیە حوکمەت ڤی باردۆخی ل بەرچاڤ وەرگریت.
د. عزەت یەحیا فندی، جێگرێ سەرۆکێ زانکۆیا پۆلیتەکنیک ل دھۆکێ خویا کر، ل زانکۆیا مە دو تەوەر ھەنە بۆ وەرگرتنا قوتابیان، تەوەرێ ئێکێ، ناوەندا وەرگرتنا قوتابیان ل زانکۆیێن ھەرێمێ بەرپرسە ژ وەرگرتنا قوتابیێن ل رێژا دوازدێ ئامادەیی زانستی یان وێژەی بەرامبەری ١٣ زانکۆیێن حکومی ل کوردستانێ ئێک ژ وان زانکۆیا مەیە، ل دووڤ پلانا خواندنا سالا نوو، زانکۆیا مە شیانێن وەرگرتنا ھزار و ١٥٥٨ قوتابیان ھەنە، نە ل دووڤ تێکرا نمرێن وان، بەلکو ل دووڤ شیانێن زانکۆیێ، ل دووڤ دیتنا وەزارەتا خواندنا بلند ئاستێ زانستی و ئەدەبی ل زانکۆیێن ھەرێمێ ب شێوەکێ گشتی نزم بوویە و ژ بۆ بلندکرنا ئاستێ زانستی ل زانکۆیان بۆ ئەڤ سالە بریارەرەک دەرکر کو قوتابیێ نمرێن وی ژ ٥٥% کێمتر بیت ناھێتە وەرگرتن ل چو زانکۆیان ل ھەرێمێ و ئەڤ چەندە نابیتە غەدر ل قوتابیان، بەلکو بۆ بلندکرنا ئاستێ وان یێ زانستیە.
ھەروەسا دبێژیت: ناوەندا بلند یا وەرگرتنا قوتابیان ل زانکۆیێن حکومی، نمران ناکەتە پیڤەر ژ بۆ وەرگرتنا قوتابیان، بەلکو ھژمارا وەرگرتنا قۆتابیان دێ ل دووڤ ھژمارا کورسیان بیت، ئەو قوتابیێن نمرێن وان ژ ٥٥% بلندتر ل زانکۆیان دێ ھێنە وەرگرتن، ئەو قوتابیێن نمرێن وان ژ ٥٥% کێمتر دێ ل پەیمانکەھان ھێنە وەرگرتن، ئەگەرێ ڤێ بریارێ ئەوە، وەزارەتا خواندنا بلند دڤێت ئاستێ خواندێ بلند بکەت لەوما ئەڤ بریارە بۆ زانکۆیێن تایبەت دەرکر و نابیت نمرێن ژ ٥٥% کێمتر ل زانکۆیێن تایبەت ژی بھێتە وەرگرتن.
ناڤبری گۆت ژی: تەوەرێ دویێ ل زانکۆیا مە ھەر سال دەرچوویێن پەیمانگەھان ئەوێن دبلوم ھەی ئەم ل رێزا دویێ ل ھندەک کولیژان وەردگرین، ئەڤ سالە نێزیکی ١٣٠ قوتابیێن دەرچوویێن پەیمانگەھان ل ھندەک کۆلیژێن زانکۆیا پۆلیتەکنیکی ھاتینە وەرگرتن، ب ڤی شێوەی مە پلانا خوە یا ئەڤ سالە ژی دیارکریە بۆ وەزارەتا خواندنا بلند.
