كه‌رنه‌ڤالێ هه‌شتێ یێ پارێزگه‌هبوونا دهۆكێ ب چه‌ند چالاكیان هاته ئه‌نجامدان
دهۆك، نه‌وزاد هلۆری:
ب مه‌ره‌ما زێده‌تر ناساندنا پارێزگه‌ها دهۆكێ، ئێڤاریا رۆژا ئه‌ینی یا بۆری ب ئاماده‌بوونا هه‌ژماره‌كا به‌رپرسێن ئیداری و حزبی و جه‌ماوره‌كێ زۆر، هه‌شته‌مین كه‌رنه‌ڤالێ هه‌شتێ یێ 53 سالیا پارێزگه‌هبوونا دهۆكێ ب چه‌ند چالاكیێن جودا هاته ئه‌نجامدان.
ل ده‌ستپێكا كه‌رنه‌ڤالێ ماراسۆنه‌كا پایسكلسواری و مه‌راسۆنه‌كا پیاده بۆ پتری دو هزار كچ و كوڕێن پارێزگه‌ها دهۆكێ هاتنه ئه‌نجام دان، پاشی پێشانگه‌ها كار و چالاكیێن پتری 30 رێڤه‌به‌ری و سازیێن جودا هاتنه نیشادان، ب ئامادبوونا پارێزگارێ دهۆكێ و به‌رپرسێن دام و ده‌زگه‌هێن حكومی و جه‌ماوه‌ره‌كێ زۆر گه‌ڕیانه‌ك د ناڤ هه‌موو پشكێن پێشانگه‌هێ دا هاته‌كرن.
ئه‌میر عه‌لی، رێڤه‌به‌رێ گشتیێ ره‌وشه‌نبیری و هونه‌ری ل پارێزگه‌ها دهۆكێ د په‌یڤه‌كێ دا دیار كر كو ئه‌و خوشحالن كه‌رنه‌ڤالێ هه‌شتێ یێ پارێزگه‌هبوونا دهۆكێ ئه‌نجام دای و گۆت: (پارێزگه‌ها دهۆكێ ژ كه‌ڤن هه‌تا نوكه ب مه‌ردایه‌تی و نیشتمان په‌روه‌ری و پێكڤه‌ژیانێ یا به‌رنیاسه، ئه‌وا ئه‌ڤرۆ ب پشكداریا هه‌موو ئالیان ئه‌م كه‌رنه‌ڤالێ 53 سالیا پارێزگه‌ها دهۆكێ ئه‌نجام دده‌ین، وه‌كو رێڤه‌به‌ریا گشتی یا ره‌وشه‌نبیری و هونه‌ری ل پارێزگه‌ها دهۆكێ كار بۆ ئاڤاكرنا مرۆڤان دكه‌ین، د پلان دابوو، كو ب چه‌ندین برگه‌یێن جودا كه‌رنه‌ڤالێ ساخ بكه‌ین، به‌لێ ژ به‌ر شه‌هیدبوون و برینداربوونا چه‌ند وه‌لاتیان ل بامه‌رنێ و كانی ماسێ مه چه‌ند برگه هه‌لوه‌شاندن، كو پێكهاتبوون ژ موزیك و سترانان).
د.عه‌لی ته‌ته‌ر، پارێزگارێ دهۆكێ په‌یڤه‌ك پێشكێش كر و گۆت: (ئه‌م دخوازین، ئه‌م هه‌موو پێكڤه كار بۆ سه‌رخستنا كوردستانێ و پارێزگه‌ها دهۆكێ بكه‌ین، ژ به‌ركو خه‌بات و قوربانیدانێن زۆر بۆ پاراستنا وان هاتینه‌كرن، ل ده‌ستپێكا بزاڤێن كوردایه‌تیێ پارێزگه‌ها دهۆكێ خه‌بات تێدا كریه، پاشی چوویه ده‌ڤه‌رێن دی یێن كوردستانێ، د نوكه ژی دا ل پارێزگه‌ها دهۆكێ پتری هه‌موو ده‌ڤه‌رێن دی خه‌بات و قوربانیدان و شه‌هید د پێناڤ پاراستنا كوردستانێ دا دهێنه كرن، ژ بلی ڤێ یه‌كێ پارێزگه‌ها دهۆكێ ب جوانی و ژینگه‌هپارێزی و پاقژیێ دهێته نیاسین و پارێزگه‌ها پێكڤه‌ژیانا ئولی و نه‌ته‌وه‌ی یه و دێ هه‌ر مینیت ژی پارێزگه‌ها پێكڤه‌ژیانێ، دڤێت ئه‌م هه‌موو كار بۆ ئاڤاكرنا پارێزگه‌ها خوه بكه‌ین، كو ئه‌ركێ مه‌هه‌موویانه، حوكمه‌تا هه‌رێما كوردستانێ و كارگێریا پارێزگه‌ها دهۆكێ ژی ل سه‌ر چێكرنا پڕۆژه و كارێن خزمه‌تگوزاری بۆ پارێزگه‌ها دهۆكێ د به‌رده‌وامن).
پارێزگارێ دهۆكێ زێده‌تر گۆت: (ئه‌و ئازادیا نوكه ب خوینا شه‌هیدان هاتیه ب ده‌ستڤه‌ئینان، دڤێت بهێته پاراستن، جهێ داخێ یه هنده‌ك گروپێن چه‌كدار یێن ده‌رڤه‌ی قانوونێ و چو په‌یوه‌ندی ب كوردستانێ ڤه نه‌یی و چو خێر و بێر ژی بۆ خه‌لكێ كوردستانێ نه‌بوویی كار بۆ داگیركرن و خراپكرنا گونده‌وارێن كوردستانێ دكه‌ت، خه‌لكێ مه ژی دبیته قوربانیێن وان، جهێ داخێ یه چه‌ند رۆژێن بۆری په‌كه‌كێ ب توپا هێرشی باره‌گایه‌كێ پێشمه‌رگه‌ی ل نێزیك بامه‌رنێ كر و د ئه‌نجام دا توپێن وان ب ناڤ سه‌یرانه‌كا وه‌لاتیان كه‌فتیه و دو شه‌هید و برینداره‌ك هه‌بوون).
هه‌ر د چارچوڤێ كه‌رنه‌ڤالێ دا، حه‌فت كه‌سایه‌تی د بیاڤێن جودا و ل ده‌ڤه‌رێن جودا هاتنه خه‌لاتكرن، كو ئه‌و ژی د. عه‌بدولره‌حمان مزووری ب خه‌لاتێ ئه‌ده‌بی، ئه‌حمه‌د مشه‌ختی ب خه‌لاتێ هونه‌ری، كوڤان حه‌سه‌ن ب خه‌لاتێ وه‌رزشی، ژیان قادر ب خه‌لاتێ چاندنێ، خه‌لیل حه‌جی نه‌زیر ب خه‌لاتێ وه‌به‌رهێنان د كه‌رتێ گه‌شت و گوزاری دا، دیسا دلدار مراد ب خه‌لاتێ زانستی و ره‌نج عومه‌ر ژی ب خه‌لاتێ سه‌ركه‌فتن ب سه‌ر چیایێ ئه‌ڤرێست.
دهێته زانین، كو ژ به‌ر روودانا شه‌هیدبوونا دو زارۆیان بناڤێ (یوسف كوڤان و ره‌ڤه‌ند هوشیار) و برینداربوونا زارۆیه‌كێ دی بناڤێ سیپان ل نێزیك بامه‌رنێ، برینداربوونا پێشمه‌رگه‌یه‌كی ل كانی ماسێ پشكه‌ك ژ برگه‌یێن كه‌رنه‌ڤالێ هاتنه لادان، كو گرێدای موزیك و سترانان بوون.
