كوردان بەربژارێ سەرۆككۆماری هەلنەبژارت، بەلكو بۆ وان هاتە هەلبژارتن
ئەندامەكێ جڤاتا نوونەرێن ئیراقێ راگەهاند: ئەنجامێ هەلبژارتنا سەرۆككۆماری بەرهەمێ رێككەفتنەكا سیاسی یا د ناڤبەرا چەند حزبان دا بوو و هوشداریێ د دەت كو «كوردان بەربژارێ سەرۆككۆماری بۆ هاتە هەلبژارتن نەكو وان ب خۆ هەلبژارتبیت.»
موسەننا ئەمین، ئەندامێ فراكسیۆنا ئێكگرتوو ئیسلامی كوردستان ل جڤاتا نوونەرێن ئیراقێ، د داخۆیانییەكا رۆژنامەڤانی دا گۆت: ئەنجامێ دەنگدانێ بۆ پۆستێ سەرۆككۆماری، دەربڕینێ ژ بەرژەوەندییا هەڤپەیمانییەكا سیاسی یا د ناڤبەرا چەند حزبان دا دكەت كو ئارمانجا وان پێكئینانا حوكمەتێ یە ب وێ شێوازێ ئەو دخوازن.
هەڤدەم ئاماژە ب وێ چەندێ ژی كر، كو ئەڤ جۆرە هەڤپەیمانییە دەلیڤەیێ نادەن كو كەسێن خودان شیان و گونجای بۆ پۆستێن بلند بهێنە هەلبژارتن، بەلكو تنێ رێككەفتنا حزبی بنەمایە.
ئەڤی پەرلەمانتاری دلتەنگییا خۆ یا كوور دیار كر كو ئالییێن كوردی نەشیاین ل سەر بەربژارەكێ هەڤپشك بۆ پۆستێ سەرۆككۆماری رێككەڤن.
موسەننا ئەمینی، هەڤبەركرنا رەوشا نوكە ل گەل خۆلا سێیێ یا جڤاتا نوونەرێن ئیراقێ كر و گۆت: «د دەمێن بۆری دا هەموو ئالییێن كوردی ل سەر بەربژاركرنا فوئاد مەعسوومی هەڤدەنگ بوون، بەلێ مخابن د ڤێ خۆلێ دا كورد دابەش بوون و نەشیان ئێكدەنگ بن.»
دووپات ژی كر، كو ژبەر ڤێ ناكۆكیێ، ئالییێن ئیراقی یێن كو هەڤپەیمانێن دەڤەری دگەل دا هەین، ئیرادەیا خۆ سەپاند و گۆت: «كوردان بەربژارێ سەرۆككۆماری هەلنەبژارت، بەلكو ئالییێن دی بۆ وان هەلبژارت.»
دەربارەی پێگەهێ سەرۆككۆماری، موسەننا ئەمینی ئەو بۆچوونە رەت كر كو ئەڤ پۆستە تنێ پۆستەكێ «تەشریفاتی» بیت و دووپات كر: «ئەوێن دبێژن سەرۆككۆمار بێ دەسهەلاتە د شاشن، رەنگە ئەڤ بۆچۆنە ژبەر رەفتارێن هندەك ژ سەرۆككۆمارێن بەرێ دروست بووبیت كو نەشیاینە كارتێكرنێ ل سەر پرۆسەیا سیاسی بكەن.»
ئاماژە ب وێ چەندێ ژی كر، كو سەرۆككۆمار د بنەرەت دا «پارێزەرێ دەستوورییە» و هەكە كەسەكێ خودان بڕیار بیت، دشێت رۆلەكێ كاریگەر د چارەسەركرنا كێشەیان و ب دەستڤەئینانا مافان دا بگێڕیت و ببیتە كارەكتەرەكێ سەرەكی د گۆڕەپانا سیاسییا ئیراقێ دا.
