كوشتنا ژنان يا زێده دبيت
ئه‌ڤرۆ نيوز:
رێڤەبەرا گشتیا بەرھنگاربوونا توندوتیژیا ھەمبەر ژنان ئاماژە بڤێ چەندێ دکەت کو، رێژەیا توندوتیژیێ ھەمبەر ژنا زێدە کریە و ئەڤ سالە پتر ژ سالا بۆری ژن ھاتینە کوشتن و گۆت: دەستدرێژیا سێکسی ئێکە ژ وان تاوانێن ھەمبەر ژنا دھێتە کرن و نوکە وەکی سالێن بۆری نینە تاوانبار خوە دناڤ مالا ئاغەیەکێ دا ڤەشێریت.
کوردە عومەر، رێڤەبەرا گشتیا بەرھنگاربوونا توندوتیژیێ دژی ژنان بۆ رۆژناما ئەڤرۆ دیار کر کو، ئەڤ سالە رێژەیا توندوتیژیێ ل ھەرێما کوردستانێ ھەمبەر ژنان زێدە کریە و ئەڤ توندوتیژیە د ھەموو بیاڤان دا د بلندبوونێ دایە بتایبەتی کوشتنا ژنان زۆر زێدە کریە، چونکی ھەیڤانە ئەم داتایێن توندوتیژیێ کۆم دکەین و ل گورەی زانیاریێن ل رێڤەبەرایەتیا گشتیا بەرھنگاربوونا توندوتیژیێ دژی ژنان ئەڤ سالە پێشلێکاری زۆر زێدە ھاتینە تۆمارکرن و گۆت: سەرەرای کو ئەم بەردەوام بزاڤان دکەین کو ئەڤ توندوتیژیە بھێتە کێم کرن.
لدور ئەگەرێن توندوتیژیێ کوردە عومەر دبێژیت: ئەگەرێن توندوتیژیێ زورن، بەلێ ئەگەرێن ھەرە سەرەکی ئەڤ قەیرانا ئابوری یا ب سەر کوردستانێ دا ھاتی و ھاتنا ئاوارەیان و خەلکێ بیانی ل گەل چەکێ بێ مۆلەت و ئامیرێن گەھاندنێ ئەگەرن بۆ کوشتنا ژنان و زێدە بوونا توندوتیژیێ، ل گەل ڤێ چەندێ ژی رێڤەبەراتیێن نەھێلانا توندوتیژیێ ب ھەما ھەنگیا دەزگەھێن دی یێن پەیوەندیدار شیاینە ھەتا رادەیەکێ زۆر تۆمەتبارێن کوشتنا ژنان و یێن پێشێلکاریێ ھەمبەر ژنان دکەن سزا بدەن، چونکی نوکە وەک سالێن بەرێ نینە کەسێن ژن کوژ پشتی ئەنجامانا تاوانێ بۆ خوە حەشاردانێ بچنە ناڤ مالا ئاغایەکی یان ژی ھەر کەسایەتیەکێ جڤاکی، راستە رێژەیا دەستەسەرکرنا تاوانباران 100% نینە، بەلێ بەراورد ل گەل سالێن بۆری قانوونێ پتر رۆلێ خوە دیتیە.
لدۆر ھەبوونا باندێن لەشفرۆشیێ دناڤا ھەرێما کوردستانێ دا رێڤەبەرا گشتیا بەرھنگاربوونا توندوتیژیێ دژی ژنان گۆت: نەشێم بێژم باندێن لەشفرۆشیێ نینن، بەلێ خەلک ھەیە بشێوەیێ باند ل کوردستانێ کارێ لەشفرۆشیێ دکەن، لێ ئەڤ بابەت گرێدایی رێڤەبەرایەتیێن نەھێلانا گونەھباریان و دەزگەھێن ئەمنی نە نەک رێڤەبەرایەتیا توندوتیژیێ دژی ژنان، بێگومان بەردەوام دەزگەھێن وەزارەتا نافخۆ لێپرسینێ ل گەل ئەڤان باندا دکەن و دھێنە دەستەسەر کرن، بەلێ وەکی ھویردەکاری ھەموو ل دەف ئەڤان دەزگەھێن من ئاماژە بۆ کری ھەنە، بۆ نموونە دناڤا کەمپێن ئاوارەیان دا ھەتا رادەیەکی بازرگانی ب ژنا دھێتە کرن، چونکی ئەگەر ھەر خەلکەک ئاوارە و بەلەنگاز بو دێ توندوتیژی دناڤدا زێدەبیت.
کوردە عومەر ئەو چەندە ژی دیارکر، پرسا دەستدرێژیا سێکسی ئێکە ژ وان پرسێن نوکە ل کوردستانێ د زێدەبوونێ دا و ب توندوتیژی دھێتە ھژمارتن، ئەڤ دەستدرێژیا سێکسی ب چەند رێیا دھێتە کرن، نوکە پتر ئەڤ پەیوەندیە ب رێیا ئامیرێن مۆبایلێ و گەھاندنێ دھێتە گرێدان و ھەردو رەگەز ژی تێدا دبنە قوربانی ھەر تنێ ژن نابیتە قوربانی چەندین زەلام ھەنە ب رێیا پەیوەندیان ل گەل ژنا تووشی ئاریشا بووینە و ھەمبەر دا پارێ لێھاتیە وەرگرتن یان ژی نەچار بوویە ئەڤێ ژنێ مەھر بکەت، لەوڕا تنێ ژن نابیتە قوربانی بەلێ مخابن ژن ژی زۆر بووینە قوربانی ئەڤێ دیاردێ، توندوتیژیا سێکسی ھەر ئەڤە نینە دەستدرێژیا سێکسی بھێتە کرن ھەتا تەحەرۆش یان ژی ئەڤا دبێژنێ گێچەلا سێکسی ھەیە دیسا ئەڤ دیاردا راوەستیانا تڕۆمبێلا ھەمبەر قوتابخانێن کچا توندوتیژیە ھەمبەر ژنا دھێتە کرن.
