كوڕێن خابووری و شەڕێ دەربازبوونا فینالێ
ئیحسان حەسەن
ئەڤرۆ ئێڤارێ كورێن خابوورێ چاڤەرێ تۆماركرنا دیرۆكەكا نوو یە بۆ وەرزشا كوردستانێ و ئیراقێ ب گشتی و پارێزگەها دهۆكێ و ئیدارەیا سەربەخویا زاخۆ ب تایبەتی، دەمێ دیدارا خوە ژ قۆناغا پێش داوییا قارەمانیێن یانەیێن كەنداڤی یا فوتبۆلێ ل دەوحە یا قەتەری دگەل یانەیا شەباب یا سعودی دكەت، زاخۆ ئەوا وەكو سەركێشا كۆم ئێكێ ب 14 خالان دەربازی ڤێ قووناغێ بووی ب سەركەڤتنێن خوە لسەر هەر ئێك ژ یانەیێن خودان دیرۆك وەكو قادسیە یا كوێتی و عەین یا ئیماراتی، خودان باشترین هێلا هێرشبرنێ د قووناغا كۆمان دا، دێ هەموو شیانان ئێختە كار كو دەلیڤەیا پشكداریا خوە یا ئێكێ ژدەست نەدەت، چەكێ وێ یێ سەرەكی دێ زاخا یاریزانێن وێ بیت، ژبلی هندێ پشت بەستن لسەر وان ئەنجام ئەو ئاستێ پێشكەڤتی یێ كو دقۆناغا كۆمان دا پێشكێشكری، ژبلی حەزا یاریزانێن وان ژبۆ تۆماركرنا دیرۆكێ بیت د پشكداریا خوە یا ئێكێ دقارەمانییەكا دەولەتی دا، بەرامبەر تیمەكێ ئەوا وەكو خودانا رێزا دویێ ب حەفت خالان پشتی یانەیا رەیان یا قەتەری دكوما خوەدا گەهشتییە ڤێ قووناغێ، لێ یا كو یانەیا سعوودی جێواز دكەت، دیرۆكا پشكدارا وانە و ئەو دەستكەڤتێن د خولا نافخویی دا بدەستڤە ئینان، زێدەباری سەربۆرا یاریزانێن وان دخولەكێ دا رەنگە وەكو ئاست یا جێواز بیت دگەل خولا ئیراقێ، ئەڤ یاریە دێ بۆ وان بیتە تاقیكرنەكا راست و دروست ژبۆ ڤەگەراندنا دەستكەڤتان، چونكو رەوشا هەردوو تیمان دخولا نافخویی دا وەكو پێدڤی نینە ب تایبەت ددیدارێن داویێ دا و ئەو رێزێن نها لێ نە ل ئاستێ هیخوازییا جەماوەرێ وانە، هەر چەندە وەكو رێزبەندی زاخۆ باشتر دهێتە دیتن، بەلێ دڤێت ئەم ژبیر نەكەین كو ئاستێ هەڤركییێ دخولا سعوودیێ دا بزحمەترە، لەوما ئەڤ یاریە دێ بۆ هەردووكان بیتە یاریا وەرزی، ژبەر كو باش دزانن سەركەڤتن دڤێ یاریێ دا پتر نێزیكبوونە بۆ پودیوما خەلاتكرنێ، دیسان رەڤینە ژگڤاشتنێن ئەنجامێ خولێ، چونكو ئەڤ یاریە دێ لیاریگەهەكا بێ لایەن هێتە ئەنجامدان، چەنسێ هەردو تیمان یێ نێزیكە، ئەگەر یاریزانێن كەلها سوور بڤێن ئەوا پێدڤی بجه بینن، دڤێت هەر لدەستپێكا یاریێ فشارێ بێخنە لسەر هێلا بەرگیریا وان ب تایبەتی د 15 خولەكێن دەستپێكی دا، ژبلی هندێ كونترۆلا ناڤەراستنا یاریگەهێ بكەن و ریتما یاریا تیما بەرامبەر تێكبدەن، ژبلی هندێ مفای ژ تەپێن جێگیر و هەڤدژ بینن، وان ڤالاهییان نەدەتە تیما بەرامبەر ب تایبەت دبەرگیریا كوم دا ژدەڤەرا خوە، بەلێ هەر دێ مینیت ئامادەباشییا دەروونی و باوەری بخوە بوون ، خواندنا یاریێ ، پلانێن راهێنەری و بجهئینانا وان دناڤا یاریگەهێ دا و خوە دووركرن ژناڤێ تیما بەرامبەر چەكێ هەرە سەرەكی و كلیلا سەركەڤتنێ بۆ كورێن زاخۆ دڤێ یاریێ دا، ب هیڤیا هندێ بشێن دلێ پشتەڤان و حەزژێكەرێن خوە ل كوردستانێ و هەموو جیهانێ خوەشبكەن.
