كچا سه‌دام حسێن دڤێت ب رێيا قانوونه‌كێ ده‌سته‌لاتێ ل عيراقێ بگريته ده‌ست
ئه‌ڤرۆ نيوز:
بەعسیێن عێراقێ دخوازن ب رێیا قانوونا لێپرسین و دادپەروەریێ ڤەگەڕن سەر دەستھەلاتێ و کچا سەدام حسێن چەندین جارا داخویانی دایە، کو دێ قانوون رێکێ دەت ڤەگەڕیت عێراقێ و خوە بەربژێربکەت، ئەندامەکا لیژنا مافێ مرۆڤی لپەرلەمانێ عێراقێ خویاکر ھێشتا بەعسی ل عێراقێ یێ کارێ خوە دکەن و دبێژیت، چو کەسەک رازینابیت ب ڤەگەڕاندنا کچا سەرۆکێ دیکتاتۆر و جارەکادی دیکتاتۆریەت ناھێتە قەبوولکرن.
دکتۆر ئەشواق جاف، ئەنداما کورد یا لیژنا مافێ مرۆڤی لپەرلەمانێ عێراقێ بۆ رۆژناما ئەڤرۆ گۆت” پڕۆژە قانوونا لێپرسین و دادپەروەریێ خواندنا دویێ ژی بۆھاتیەکرن و چاڤەڕێ دھێتەکرن بکەڤیتە ناڤا کارناما کۆمبوونەکا پەرلەمانی ھەتا دەنگ لسەر بھێتەدان و بھێتە پەسەندکرن، ئەف قانوون یا تایبەتە ب کەسێن بەعسی و بەرپرس و ئەندامێن حزبا بەعسا ژناڤچویی، مخابن ناھێتە ڤەشارتن ئەف قانوونا لێپرسین و دادپەروەریێ لسالێن بۆری وەکی پێدڤی نەھاتیە بجە ئینان، ھەرکەسەکێ بدلێ ڤان بیت ھاتیە دەرکرن ژ قانوونێ و ھەتا لسالا 2010 رێکەفتنەکا سیاسی ھاتەکرن بۆڤێ چەندێ ھژمارەک زەلامێن سەردەمێ رژێما بەعس بھێنە دەرئینان ژ قانوونێ، نوکەژی خەلکەک ھەیە بەعسیە و لسەر دەستھەلاتێ یە، یان چێترە بێژم پۆستەک ھەیە، بۆنموونە چەندین ئەفسەرێن پلە بلند ھەنە یێن سەردەمێ بەعسیان و دەست ھەبوویە ل کوشتنا وەلاتیێن عێراقێ نوکە د کارێ خوەدا ماینە، نەعەدالەتیەکا مەزن ھەبو ل بجە ئینانا ئەڤێ قانوونێدا و پێدڤیە وەک ھەڤیەک ھەبیت، چونکە قانوون بۆ ھەموو کەسا وەکی ئێکە نابیت چو کەس بھێتە دەرکرن ژ قانوونێ.
دکتۆر ئەشواقێ گۆتژی” ھەرکەسەکێ پلەکا سەربازی یان مەدەنی ھەبیت ل سەردەمێ بەعسیا نابیت ئەڤرۆ پشکداربیت د پڕۆسا سیاسیا عێراقێ دا، ژبەرکو دێ رۆلەکێ خراپ ھەبیت، لێبۆرینا گشتی ژی ئەڤان کەسێن بەعسی ڤەناگریت، نوکە دانوستان یێ دھێنەکرن بۆ پەسەندکرنا پڕۆژە قانوونا لێپرسینێ ھێشتاژی نە عەدالەتی تێدا ھەیە، گورەی پڕۆژێ نوکە بیت تێدا ھاتیە دڤێت ئەف کەسێن زەروربن بھێنە دەرکرن ژ قانوونێ و نابیت قانوونێ و نابیت قانوون ئەڤان کەسێن پێدڤی پێھەبیت ڤەگریت، باشە بۆچی ھندەک کەسا زەرورەت ھەیە، یان دڤێت قانوونا لێپرسینێ ھەموویان ڤەگریت یان نابیت لسەر چو کەسەکی بھێتە بجە ئینان.
لدۆر ڤەگەڕیانا کەس وکارو کچا سەدام حسێن بۆ عێراقێ دکتۆر ئەشواقێ دیارکر، لسالێن بۆری کچا سەدام حسێن سەرۆکێ بەرێ یێ رژێما ژناڤچوویا عێراقێ رۆلەکێ تێکدەر دیتیە ل عێراقێ و ئەز باوەرناکەم چو کەسەک رازیبیت ئەف کچا سەدامی ڤەگەڕیت عێراقێ و پشکداریێ د پڕۆسا سیاسی دا بکەت، چەندین جارا داخوانی دژی پڕۆسا سیاسیا عێراقێ داینە و ھەرکەسەکێ بەری ئازادکرنا عێراقێ رۆلەکێ خراپ ھەبیت ئەڤە ناڤەگەڕیت سەر پۆستێ خوە و جارەکادی رێک ب دیکاتۆریەت ناھێتەدان جھێ خوە ڤەکەت، نوکەژی بەعسی ل عێراقێ لڤینان دکەن، بەلێ بشێوەیەکێ ڤەشارتی و لبن پەردەکێ دیکە کارێ خوە دکەن، ئەم ب چو شێوەیەکی دەنگی بۆڤێ پڕۆژە قانوونێ نادەین ئەگەر ھندەک کەس بھێنە دەرکرن ژ قانوونێ.
