كۆمبوونه‌ك ل دۆر بجهئینانا قانوون وبریارێن په‌رله‌مانى بۆ راگرتن و راكرنا زێده‌گاڤیان
ئه‌ڤرۆنيوز:
ل دووڤ راسپاردێن كونفرانسێ تایبه‌ت یێ وه‌زاره‌تا ناڤخوه‌یا هه‌رێما كوردستانێ ژبو بجهئینان اقانون وبریارێن په‌رله‌مانێ كوردستانێ ل دۆر راگرتن وراكرنا زێده‌گاڤیان ل سه‌ر ئه‌ردێن میری، به‌هزاد عه‌لی ئاده‌م، جێگرێ پارێزگه‌رێ دۆكێ ب ئاماده‌بونا حاكم محه‌مه‌د شه‌ره‌فانی، سه‌رۆكێ دادگه‌ها دهۆكێ كۆمبوونه‌كا تایبه‌ت دل گه‌ل قایمقام ورێڤه‌به‌رێن ناحیان ورێڤه‌به‌رێن فه‌رمانگه‌هێن په‌یوه‌ندیدار سازكر.
دكۆمبونێ دا به‌حسێ چاوانیا بجهئینانا بریارێن په‌رله‌مانێ كوردستانێ ودانانا میكانزمه‌كا گونجای بۆ بجهئینانا بريارێن په‌رله‌مانی و رێنمایێن وه‌زاره‌تێن په‌یوه‌ندیدار بۆ راگرتن وراكرنا زێده‌گاڤیان ل سه‌ر ئه‌ردێ میری هاته كرن.
دكۆمبونێ دا جێگرێ پارێزگه‌رێ دهۆكێ وسه‌رۆكێ دادگه‌ها دهۆكێ ب تێرو ته‌سه‌لی رۆهنكرن دانه سه‌ر ناڤه‌رۆكا قانوونێن په‌رله‌مانێ كوردستانێ وراسپاردێن كونفرانسێ تایبه‌ت ل دۆر راگرتن ونه‌هێلانا زێده‌گاڤیان وميكانيزما بجهئینانا وان قانوونان ژبۆ راگرتن وراكرنا هه‌موو زێده‌گاڤیان ل سه‌ر ئه‌ردێن میری وداخواز ژرێڤه‌به‌رێن فه‌رمانگه‌هێن میری ولژنێن كاركرنێ ووه‌لاتیان كر كو هه‌موو دهاریكاربن بۆ بجهئینانا وان قانوون وبریاران.
جێگرێ پارێزگه‌رێ دهۆكێ وسه‌رۆكێ دادگه‌ها دهوكێ ته‌كه‌زكرن كو ل هه‌ر قه‌زایه‌كێ لژنه هاتینه دامه‌زراندن ودادوه‌ر هاتینه ده‌ستنیشانكرن كو هه‌ماهه‌نگیێ دگه‌ل هه‌ڤدو وهه‌موو فه‌رمانگه‌هێن په‌یوه‌ندیدار بكه‌ن بۆ نه‌هێلانا زێده‌گاڤیان ل سه‌ر ئاستێ قه‌زا وناحی وگوندان.
هه‌روه‌سا ته‌كه‌زكرن كو دڤێت قانوون ورێنمایێن راگرتن وراكرنا زێده‌گاڤیان ب رێيا ده‌زگه‌هێن راگه‌هاندنێ وموختار ونڤێسینگه‌هێن كرین وفروتنا ئه‌رد وخانیان بۆ وه‌لاتیان بهێنه دیاركرن ژبۆ وێ چه‌ندێ ئه‌و كه‌سێن زێده‌گاڤی كرین قه‌ستا وان لژنا بكه‌ن وجۆرێ زێده‌گاڤیا خوه توماركه‌ت .
پاشه به‌رهه‌ڤبویێن كۆمبوونێ چه‌ند پرسیار وپێشنیار ل دۆر شێوازێ كاركرن وبجهئینانا بریار وقانوونێن په‌رله‌مانێ كوردستانێ ورێنمایێن وه‌زاره‌تێن په‌یوه‌ندیدار كرن وبه‌رسڤ ل سه‌ر هاتنه دان .
ل دووماهیێ بریار هاته دان كو لژنێن راگرتن وراكرنا زێده‌گاڤیان ل سه‌ر ئاستێ قه‌زا ژی كۆمبوونێن خوه بكه‌ن وپێشنیار وبوچونێن خوه ب شێوه‌كێ نڤێسكی ئاراسته‌ی لژنا بلند ل پارێزگه‌هێ بكه‌ن ومفا ژێ بهێته وه‌رگرتن.
